Tito 2 - Biblia Guarani Tumpa Iñee

Mboromboe añete vae

¹ Ërei nde nemiari yave eporomboe añete vae re.

² Ndechi reta agüɨye tei teiiño, jeko tisɨmbi, toyeandu katu, tipɨ̈rata iporogüɨrovia pe, iporoaɨu pe jare tipɨaguasu.

³ Jaeramiño vi kuña okuakuaa vae reta tijeko kavi, agüɨye tiporoangaose, agüɨye tikause, toporomboe ikavi vae re;

⁴ tomboe kuña taɨrusu vae reta oaɨu vaerä ime jare imembɨ reta,

⁵ oyeandu vaerä, jare tikɨambae Tumpa jóvai, oyangareko kavi vaerä jo re, ipɨakavi vaerä, oiko vaerä ime jeia re, agüɨye vaerä jeiuka ikavimbae vae Tumpa iñee kotɨ.

⁶ Jaeramiño vi emboarakuaa kuimbae taɨrusu vae reta oyeandu vaerä.

⁷ Nde etei eyapo opaete mbaravɨkɨ reta ikavi vae, eporomboe añete vae re, ndereko tisɨmbi,

⁸ eiporu ñee reta ikavi vae, agüɨye vaerä kia ndemboeko rere vae re, oyovaicho ndekotɨ vae imara vaerä, agüɨye vaerä jei mbae ikavimbae vae ndekotɨ.

⁹ Emboarakuaa tembiokuai reta yogüɨreko vaerä iya jeia re, tomboyerovia iya opaete mbae pe, agüɨye toyaka iya;

¹⁰ agüɨye timonda, ërei toechauka kavi iya pe ipuere vaerä güɨrovia katu, jökorai oikuaaukata ikavi yae ko Tumpa Yandemboasa vae iporomboe.

¹¹ Echa Tumpa ipɨakavi oyekuaa ko opaete vae oyemboasauka vaerä,

¹² Tumpa ipɨakavi yandemboe yaeya vaerä mbaeyoa reta jare soo jemimbota ɨvɨ pegua, jare yaiko yaikuaa kavi reve, jupi rupi, yamboete reve Tumpa,

¹³ jare ñaäro yayerovia reve yandeRu Tumpa yandemboasa vae Jesucristo ou yeta vae.

¹⁴ Echa jae oñemee omano vaerä yanderé, jae yandereepɨ vaerä opaete ikavimbae güi, jare oyoe vaerä yandepɨa yandeyoa reta güi, yandeapo vaerä imbae retarä, yaipota yae vaerä yayapo mbaravɨkɨ ikavi vae.

¹⁵ Kuae re nemiari, eporomboarakuaa jare emboeta mbaepuere rupi kavi. Agüɨye kia ave tanereröɨro.