Tito 1 - Biblia Guarani Tumpa Iñee

Tamaraeme

¹ Che Pablo, Tumpa jembiokuai jare Jesucristo jemimondo. Jae chemondo Tumpa oiparavo vae reta pe güɨrovia vaerä jese, jare oikuaa vaerä añete vae, omboete vaerä Tumpa,

² jare oäro vaerä oyerovia reve tekove opambae vae. Echa Tumpa iyapumbae vae jókuae güɨrökuavee yandeve ndei ɨvɨ oyeapo mbove.

³ Jare ara oväe yave oikuaauka iñee che amoërakua vae rupi. Tumpa Yandemboasa vae cheokuai vae rupi.

⁴ Aikuatía kuae tupapire ndeve Tito, cheraɨ añetete vae mborogüɨrovia rupi: YandeRu Tumpa jare yandeYa Jesucristo ipɨakavi jare iporoparareko jare ipɨakatu toï nde ndive.

Oporogüɨrovia vae reta itenondegua kërai oyeparavo vaerä

⁵ Che roeya Creta pe reyapokatu vaerä opaete oata oyeapokatu vaerä vae, jare reñono vaerä oporogüɨrovia vae reta itenondegua retarä tëta guasu ñavo rupi che royókuai rami.

⁶ Oporogüɨrovia vae reta itenondegua toiko kavi, agüɨye vaerä kia teko oväe jese, meteiño tijembireko, imichia reta toporogüɨrovia, jare agüɨye toyapo ikavimbae vae, ani tipɨapochɨ tu reta kotɨ.

⁷ Oporogüɨrovia vae reta itenondegua ikavi ko mbaetɨ oñeväe teko jese, Tumpa iparavɨkɨ oyapo vae; agüɨye tipɨapochɨ, agüɨye tiyarasɨ katu, agüɨye tikause, agüɨye tiñerarose, agüɨye tomonganaiño jupimbae reve,

⁸ tomboresive katu mboupa, ikavi vaeño toaɨu, agüɨyeta jei jeiiño, tijupi, toñeñono tee, jete jemimbota toyopia vae,

⁹ ipɨ̈rata ñee añetegüe re oyemboegüe vae, ipuere vaerä oporomboarakuaa añete vae rupi, jare oikuaauka kavi vaerä oyovaicho jae ndive vae reta pe.

¹⁰ Echa oimeño jeta iñeereendumbae reta, osirivembae re imiari jare oporombotavɨ vae reta; kuae ko jae judío reta.

¹¹ Ikavi ko jókuae reta ñamokïrii vaerä. Echa jae reta oporomboe omonganaiño jupimbae reve jese vae re; jókuae iporomboe rupi ombojopa opaetei o pegua reta.

¹² Metei chugüi reta, jae reta iñeemombeúa, jei körai: “Cretaɨgua reta iyapu avei, yavaete jeko, ikaru yae jare iyakɨ yae reta.”

¹³ Kuae imiari jese reta vae añete ko. Jáeramo tätagüe emboeta chupe reta, oñemomɨ̈rata reta vaerä iporogüɨrovia pe,

¹⁴ agüɨye toyeapɨsaka reta judío reta iarakae ndaye reta re jare oyerova ma añete vae güi vae reta iporookuai reta re.

¹⁵ Iyemongeta ikɨambae vae reta pe opaete mbaembae ikɨambae ko. Ërei oporogüɨroviambae vae iyemongeta ikɨa vae pe opaete mbaembae ikɨa ko. Echa ipɨa jare iyemongeta opaetei oikomegua.

¹⁶ Jae reta jei tëi oikuaa Tumpa, ërei jembiapo reta rupi mbaetɨ etei omboyekuaa oikuaa ko Tumpa vae, jae reta ko jeko pɨ̈chɨi yae, ipɨapochɨ, oyapo rapeä etei mbae ikavi vae.