SOFONÍAS 2 - Biblia Guarani Tumpa Iñee

¹ Pe tëtaguasu imarambae reta, peyemboatɨ jare peyemongeta,

² ndei mborookuai oime pekotɨ vae ou mbove, ndei ara oasa ɨtɨ rami mbove ndei yandeYa iyarasɨ oa peré mbove, ndei ou peré yandeYa iporojäa iara mbove.

³ Peeka yandeYa, opaete ipɨa omomichi vae reta, iporookuai oyapo vae reta. Peyapo jupi vae jare peñemomichi, jayave, güɨramoi peñeñovatuta yandeYa iporojäa iara pe.

Ïru tëtaguasu reta oiporarata vae

⁴ Tëta guasu Gaza opɨtata ipombae, jare tëta guasu Ascalón opɨtata kïrii ngatu; jare tëta guasu Asdod pegua reta opata oñerenoeuka oyemombo kuaraɨ ara mbɨte pe etei, tëta guasu Ecrón pegua reta opata oñemokañɨtei.

⁵ ¡Paravete, ɨguasu jembeɨ rupi oñemoëta vae, cereteo reta! Tumpa jei körai: “¡Canaán, filisteo reta iɨvɨ, opata ndeipo reta amokañɨtei!

⁶ Jókuae tëtaguasu oï ɨguasu jembeɨ rupi vae oikota mɨmba reta ikaruaräño, mɨmba iyangarekoa reta peguarä, jokoropi oimeta mɨmbarokaiño.”

⁷ Judá iñemuña jembɨregüe reta yogüɨrekota jókuae ɨvɨ pe, joko pe omongaru retata jɨmba reta, jare pɨ̈tu yave oputuu retata Ascalón pegua o reta pe; echa yandeYa Tumpa outa omborɨ vaerä, jae opata güeru ye tembipɨɨ reta.

^8-9 YandeYa Imbaepuere yae ete vae jei körai: “Che aendu Moab iñemuña reta iporoangao jare Amón iñemuña reta iñeeasɨ tëta chembae vae kotɨ. Echa jei reta mbae jasɨ katu vae tëta chembae vae kotɨ, jare jae reta iɨvɨ pe oyembotuicha reta. Jáeramo, tae cheree re aeño: Moab iñemuña reta oasata Sodoma oasa rami, Amón iñemuña reta oasata Gomorra oasa rami, ñurati oñemuñata joko pe, yukɨ rendarä opɨtata. Kïrii ngatu aveita opɨta. Tëta chembae vae güi jembɨregüe opata güɨnoe omombo joko güi, jare oike retata yogüɨreko jókuae ɨvɨ pe.”

¹⁰ Köraita ko jekovia Moab pe jare Amón pe, ipɨapochɨ jeko pegua, yandeYa imbae vae reta kotɨ iñeeasɨ katu reta jeko pegua, oyembotuicha reta yandeYa Imbaepuere yae ete vae imbae vae reta iɨvɨ pe jeko pegua.

¹¹ YandeYa ngaraa ipïri jese reta. Opata omboai tumpa-raanga reta jókuae ɨvɨ pegua, jare opaete vae tëtaguasu omboeteta, ɨguasu ipäu pegua reta ave.

¹² ¡Pe Etiopía pegua reta vi, pemanota yandeYa ikɨsepuku pe!

¹³ Jae omopüata ipo ɨvɨtuguasu kotɨ omboai vaerä Asiria, tëta Nínive oeyata kïrii ngatu, ñuu rami otinita opɨta.

¹⁴ O regua ɨvɨra opata oyeekɨ, joko pe vecha reta oyapakuata, jare oipotagüe mɨmba reta; güɨratï jare küi oketa ventana jare ökegüe re, iñee reta oyeenduta; surumbukuku jare chucha oñeeta joko pe.

¹⁵ Kuae, jae ko jókuae tëta guasu ipɨagüive oiko vae, pɨpegua reta jei yepi jaeño ko ikavi yae vae. ¡Kërai, opa opɨta ñana rupigua mɨmba pochɨ vae reta jëtarä! Jokoropi oasa vae reta otuviñee jare ombovava ipo jese oyóyai reve.