SOFONÍAS 1 - Biblia Guarani Tumpa Iñee

YandeYa iporojäa iara

¹ YandeYa jei Sofonías pe, Josías Amón taɨ oiko Judá pe mburuvicha guasurä yave. Sofonías tu jae Cusi, Cusi tu jae Gedalías, Gedalías tu jae Amarías, Amarías tu jae Ezequías.

² YandeYa jei körai: “Amboaita opaete mbaembae oime ɨvɨ iárambo vae.

³ Amokañɨteita kuimbae reta, mɨmba reta, güɨra reta, pira reta, ngaraa amaeño iyoa vae re; amokañɨteita kuimbae reta ɨvɨ iárambo güi.” YandeYa jei körai:

⁴ “Amopüata chepo Judá kotɨ, opaete Jerusalén pegua reta kotɨ. Amboaita kuae güi opaete mbaembae tumpa-raanga Baal regua opɨta vɨteriño vae, jare opaete isacerdote itumpa-raanga pota vae reta jee.

⁵ Amboaita jo iárambo oyeupi oyetavatɨka omboete vaerä yasɨtata, kuaraɨ, yasɨ vae, jare oyetavatɨka reta jei cheree re jare itumpa-raanga Milcom jee re vae reta.

⁶ Amboaita vi opia chegüi vae reta, jare mbaetɨ chereeka vae, mbaetɨ oyerure cheve vae reta.”

⁷ ¡Peñemokïrii yandeYa jóvai, echa iporojäa iara oväeta ma! ¡YandeYa oporoyukata oï, jare opa ma oiparavo jembiparea reta!

⁸ YandeYa jei: “Jókuae ara cheporoyuka ou oväe yave, aiporaraukata mburuvicha reta pe, mburuvicha guasu taɨ reta pe, jare temimonde ketɨgua omonde vae reta pe.

⁹ Jaeramiño vi aiporaraukata jókuae ara, itumpa-raanga jöke oyapɨraa vae reta pe, iya jo omotɨnɨe oñomigüe pe ani oporombotavɨgüe pe vae reta.”

¹⁰ YandeYa jei: “Jókuae ara oyeenduta täsémbai, öke Pira röke jee vae güive. Jare vi tëta jembeɨ ïru kotɨ jare oyeenduta kërai jɨapu osururu ɨvɨtɨ vae.

¹¹ ¡Peyaeo, pe tëta Mactes jee vae pegua reta, echa opata okañɨtei omaemee vae reta, opaete korepoti omee vae reta!

¹² Jókuae ara, amoendɨta metei mechero jare amboesapeta amae Jerusalén re. Jare aiporaraukata jókuae ipɨagüive ñogüɨnoi vae reta pe, vino kïrii ngatu oï kopa pe rami vae, echa jókuae reta jei iyeupe: ‘¡YandeYa ngaraa oyapo mbae, ngaraa oyapo ikavi vae ani ikavimbae!’

¹³ Jáeramo, opata oñepɨ̈ro imbaembae, jare jo reta opata oyemboai. Oyapo retata o, ërei ngaraa yogüɨreko pɨpe; oñotɨ retata uva, ërei ngaraa jou reta vino oyeapo chugüigüe.”

¹⁴ ¡Köi yae ma ou vaerä yandeYa iporojäa iara yavaete yae vae! ¡Köi yae ma, outa ete ma! YandeYa iporojäa iara yavaete yaeta jɨapu: ¡Jëia yae vae jäseta jókuae ara!

¹⁵ Tumpa iyarasɨ iara ko jókuae ara, mbɨatɨtɨ jare pɨajopa iara, yembokepegua jare kañɨtei iara, pɨtumimbi yae vae iara, jare amapɨtu jüu yae vae iara;

¹⁶ mimbɨguasu ñeraro pegua jare sapúkai ñeraro pegua iara outa tëta guasu oñekëse kavi vae re, jare jo ɨvate yae vae, sundaro reta imaeka re.

¹⁷ YandeYa jei: “Aiporaraukata kuimbae reta pe, jare oguata retata jesambae rami, echa iyoa reta chekotɨ. Jugüɨ oyepɨyereta ɨvɨkúi rami, jare isoo oyemboatɨta tepoti rami.”

¹⁸ YandeYa iporojäa iara pe, kuimbae reta ngaraa oyereroasayepe, ikorepoti rupi ani ioro rupi ave, echa yandeYa jägüɨro jeko pegua iyarasɨ yae, opaeteita omboai mbaembae kuae ɨvɨ pe. ¡Opaete ɨvɨ pegua reta okañɨteita jarembae pegua!