Santiago 5 - Biblia Guarani Tumpa Iñee

Oikokatu vae reta oporogüɨrekoasɨ katu vae regua

¹ ¡Peyeapɨsaka, pe peikokatu vae reta! Peyaeo jare peräse, susere reta outa peré vae re.

² Pembaeyekou reta opa oikomegua, jare kupii reta opa jou peremimonde reta.

³ Peoro jare pekorepoti reta opa iyukɨrɨ. Jare jókuae iyukɨrɨgüe imiarita pekotɨ, jare pemokañɨteita tata rami. Pemboatɨ ko mbaembae, ara reta iyapɨ peguarä.

⁴ Mase, oparavɨkɨ vae reta ombaarɨvo peve vae reta pe mbaetɨ pemboepɨ vae, oñeapo oï peré. Pe reta pembotavɨ rupi mbaetɨ pemboepɨ chupe vae. Jare yandeYa Imbaepuere yae vae oendu ma iñeengeta peve jókuae ombaarɨvo vae reta vae.

⁵ Kuae ɨvɨ pe peiko ramboeve, peiko kavi yae ko jare peyapo pepuere rupi pepɨa jemimbota reta. Peyemongɨra ko, mɨmba oyemongɨra oyeyukata vae rami.

⁶ Pe reta pemboeko jare peyuka jókuae jupi vae. Jare jae mbaetɨ oyeepɨ pegüi.

Pepɨaguasu jare peyerure Tumpa pe

⁷ Jáeramo, cherɨvɨ reta, pepɨaguasu yandeYa ou ye regua. Mase, omaetɨ vae oäro ko mbaagüɨye ikavi vae; oäro ipɨaguasu reve tenondegua ama.

⁸ Jökoraiño vi pe reta pepɨaguasu. Jekuaeño peñemoäta ngatu. Echa oyearo ma yandeYa ou ye vaerä.

⁹ Cherɨvɨ reta, agüɨye peñeengeta oyokotɨ, agüɨye vaerä peyemboekouka. Echa oporojäa vae öke pe ma oï.

¹⁰ Cherɨvɨ reta, pemomoe ñeemombeúa reta jókuae imiari yandeYa jee re vae reta, kërai jae reta oiporara jare ipɨaguasu vae.

¹¹ Añete ko, yandeve oyerovia ko jókuae oiporara vae reta. Peikuaa kërai Job ipɨaguasu yae vae regua, jare yandeYa kërai iporerekua jese taɨkue rupi vae. Echa yandeYa iporoaɨu jare iporoparareko yae.

¹² Ërei, cherɨvɨ reta, agüɨye pere ara jee re ani ɨvɨ jee re ani ïru jee re ave. Pere yave: “Ayapota”, peyapo. Ani pere yave: “Ngaraa ayapo”, agüɨye peyapo, agüɨye vaerä peñejäauka.

¹³ Oime yave kia pepɨte pe oiporara vae, toyerure Tumpa pe. Oime yave kia pepɨte pe oyerovia vae, tomboete Tumpa tairari pe.

¹⁴ Oime yave kia pepɨte pe imbaerasɨ vae, toenɨi oporogüɨrovia vae reta itenondegua reta. Jare jae reta toñono asaite imbaerasɨ vae re yandeYa jee re, oyerure reve jese.

¹⁵ Jare mborogüɨrovia reve oyerure reta yave, imbaerasɨ vae okuerata ko. Echa yandeYa omopüata ko. Jare imbaerasɨ vae oyapo yave mbaeyoa reta, Tumpa iñɨ̈rota chupe.

¹⁶ Peyoa yave oyokotɨ, pemombeu oyoupe, javoi peyerure oyoe, Tumpa pembogüera vaerä. Jupi vae iyerure opaete ipɨa reve vae, güɨnoi mbaepuere.

¹⁷ Elías ko metei kuimbae yande rami vae, ërei jae oyerure opaete ipɨa reve agüɨye vaerä okɨ yave, mbaetɨ etei okɨ mboapɨ año jare ova yasɨ.

¹⁸ Jare Elías oyerure ye Tumpa pe jare omboɨpɨ okɨ jare oime ye mbaagüɨye.

¹⁹ Cherɨvɨ reta, oime yave pegüi reta kia opia añete vae güi, jare ïru vae omborɨ yave oyerova ye,

²⁰ peikuaa kuae: Jókuae oporomborɨ vae oepɨ ko jókuae opia vae jekove mano güi, jare Tumpa iñɨ̈rota jeta imbaeyoa reta re.