Santiago 4 - Biblia Guarani Tumpa Iñee

Ñomoïru ɨvɨ pegua

¹ ¿Ketɨ güi pa oë peñoraro vaerä oyoupii? Oë ko peremimbota ikavimbae vae pemoambeko yae peɨvɨte pe penoi vae güi.

² Peipota tëi mbaembae, ërei mbaetɨ penoi. Peporoyuka jare peporomotareɨ, ërei mbaetɨ pepuere penoi peipota vae. Peñeraro jare pekaguai, ërei mbaetɨ penoi peipota tëi vae, echa mbaetɨ peyerure Tumpa pe.

³ Peyerure tëi, ërei mbaetɨ pemboresive, echa peyerure kaviä. Echa peyerure mbaembae re peiporu vaerä pepɨa jei vae reño.

⁴ Pe reta menda re oyuvanga vae reta rami ko. ¿Mbaetɨ pa peikuaa oñomoïru ɨvɨ pegua ndive vae oyovaicho ko Tumpa ndive? Oipotagüe oñemoïru ɨvɨ pegua ndive vae, oyeapo ko Tumpa jovaichorä.

⁵ Tumpa Iñee oyekuatía oï vae añete vae ko, echa jei: “Espíritu jae oñono yandepɨa pe vae, jägüɨro yae yanderé.”

⁶ Ërei Tumpa omee yandeve jeta yae ipɨakavi, echa oyekuatía oï: “Tumpa oyovaicho ipɨarai vae reta kotɨ, ërei ipɨakavi oñemomichi vae reta kotɨ.”

⁷ Peñeñono Tumpa ipo igüɨ pe. Peñemomɨ̈rata añaguasu pe, jare jae otekuaraita pegüi.

⁸ Peyemboya Tumpa re jare jae oyata peré. Iyoa vae reta, peyepoe. Pe iyemongeta oipoepɨ katu vae reta, peitɨo pepɨa.

⁹ Pepɨatɨtɨ jare peyaeo. Pepuka toyepoepɨ yaeo pe, peyerovia toyepoepɨ mbɨatɨtɨ pe.

¹⁰ Peñemomichi yandeYa jóvai, jare jae pembotuichaukata.

Agüɨye pere ikavimbae vae oyokotɨ

¹¹ Cherɨvɨ reta, agüɨye peñeenguru oyokotɨ. Kia iñeenguru jare ojäa jëtara vae, iñeenguru jare ojäa ko mborookuai. Ërei nde rejäa mborookuai yave, jaeä ko nde mborookuai jei vae iyapoa, jaeño ojäa vae.

¹² Meteiño ko mborookuai omee vae, jae ipuere oporomboasa jare oporomokañɨtei. ¿Ërei kia pa nde rejäa vaerä ïru vae?

Mbaetɨ peikuaa këraita ra pɨareve vae

¹³ Peyeapɨsaka kuae re, pe: “Añave ani pɨareve yaja jókuae tëta guasu pe, jare yaiko joko pe metei año. Yagua mbaembae jare ñamee ñamongana vaerä korepoti”, pere vae reta.

¹⁴ Ërei pe reta mbaetɨ peikuaa këraita ra peï pɨareve vae. ¿Peikoveñota ra pɨareve pe? Echa perekove ɨ̈vɨti ramiño ko. Oyekuaa michi peguaño jare okañɨ ɨmambae.

¹⁵ Jáeramo pereta tëi körai: “YandeYa oipota yave, yaikota joko pe jare yayapota mbaembae.”

¹⁶ Ërei ngatu jökorai pere vaerägüe, peyemboete pepɨarai reño. Opaete jókuae nunga yemboete, ikavimbae ko.

¹⁷ Jáeramo peikuaa tëi mbae ikavi vae peyapo reve peyapoä yave, peyoa ko.