Santiago 2 - Biblia Guarani Tumpa Iñee

Yayoparavoño vae regua

¹ Cherɨvɨ reta, perovia yandeYa Jesucristo re vae reta, agüɨye peyoparavoño pemae kavi oyoe.

² Güɨramoi oiketa peyemboatɨa pe kuimbae ipoäka-vera oro pegua vae jare oyemonde kavi vae, jare oike vi kuimbae paravete vae jemimonde ipächa vae.

³ Jare pemae kavi yave jókuae oyemonde kavi vae re, jare pere yave chupe: “Eguapɨ kuae tenda ikavi vae pe”; ërei pere yave iparavete vae pe: “Eyemboɨ joko pe”, ani “eguapɨ ɨvɨ pe”,

⁴ jökorai yave peporoparavo ma ko peï oyoupii. Peyeapo oporojäa vae rami peyemongeta kavimbae rupi.

⁵ Cherɨvɨ aaɨu vae reta, peyeapɨsaka cheré. Tumpa oiparavo iparavete vae reta oikokatu vaerä iporogüɨrovia re jare güɨnoi vaerä imbaerä mborookuaía, jókuae Tumpa güɨrökuavee omee vaerä opaete güɨnoi mboroaɨu ikotɨ vae reta pe.

⁶ Ërei pe reta peñeeasɨ katu paravete vae reta kotɨ. ¿Mbaetɨ pa peikuaa oikokatu vae reta ko pererekoasɨ katu vae jare pereraja mburuvicha reta jóvai vae?

⁷ ¿Mbaetɨ pa peikuaa oikokatu vae reta jei ikavimbae vae Jesucristo jee pemboete vae kotɨ vae?

⁸ Peyapo yave jupi rupi mborookuai añetete vae, Tumpa Iñee pe jei rami, körai: “Eaɨu nderapicha nde reyeaɨu rami.” Peyapo ko ikavi vae.

⁹ Ërei peyoparavoño pemae kavi oyoe yave, peyoa ko. Mborookuai jei vae rupi teko pe ma ko pepɨta.

¹⁰ Echa oime yave kia oyapo opaete mborookuai jei vae, ërei metei oyavɨ yave, oyavɨ ma opaete mborookuai.

¹¹ Echa jei: “Agüɨye eyuvanga menda re.” Jei vi: “Agüɨye eporoyuka.” Güɨramoi nde mbaetɨ reyuvanga menda re. Ërei reporoyuka yave, reyavɨ ma ko mborookuai.

¹² Pemiari kavi jare peiko kavi, echa Tumpa pejäata mborookuai oporoyora vae rupi.

¹³ Echa kia mbaetɨ oiparareko japicha vae, Tumpa ojäata oipararekombae reve; ërei oporoparareko vae mbaetɨta oñejäa.

Mborogüɨrovia oyekuaa yayapo vae rupi

¹⁴ Cherɨvɨ reta, güɨramoi kia jei güɨnoi ko mborogüɨrovia, ërei jembiapo reta mbaetɨ oyekuaa yave. Ngaraa omboasa iporogüɨrovia.

¹⁵ Güɨramoi metei perɨvɨ ani pereindɨ mbaetɨ güɨnoi jemimonderä ani jembiurä.

¹⁶ Jare metei pegüi jei yave chupe: “Tumpa ndiveño ekua, emboyoarambo nderemimonde jare ekaru”, ërei mbaetɨ omee chupe jókuae oata vae yave, jókuae jei vae mbaeä ko.

¹⁷ Jökorai ko mborogüɨrovia, mbaetɨ jembiapo reta oyekuaa yave, mbaeä etei ko.

¹⁸ Güɨramoi kia jeita: “Nde renoi mborogüɨrovia jare che oyekuaa cherembiapo reta.” Eechauka cheve ndeporogüɨrovia oyekuaambae reve nderembiapo reta. Jare che aechaukata ndeve cheporogüɨrovia cherembiapo reta rupi.

¹⁹ Nde rerovia oime ko meteiño Tumpa. Jaekavi ko jókuae rerovia vae. Ërei aña reta vi güɨrovia jare orɨrɨi reta okɨɨye güi.

²⁰ Yarakuaambae vae, ¿reipota pa aikuaauka vaerä ndeve? Mborogüɨrovia jembiapo reta oyekuaambae vae, mbaeä etei ko.

²¹ Nemaendúa ñaneñemuñagüe Abraham oyembojupiuka jembiapo rupi vae re, omee taɨ Isaac mɨmba oyeyuka oyeapɨ jese vae re yave.

²² Iporogüɨrovia oyekuaa jembiapo rupi, jare iporogüɨrovia oyembokavi yae jembiapo reta rupi.

²³ Jare oyembopo Tumpa Iñee pe jei vae: “Abraham güɨrovia Tumpa, jókuae iporogüɨrovia rupi omae jese jupi. Jare Tumpa ombojee Abraham, jae ko ivɨa-ïru.”

²⁴ Jáeramo pepuere peecha kërai Tumpa ombojupi kuimbae jembiapo reta rupi, mbaetɨ ombojupi mborogüɨrovia reño.

²⁵ Jökorai vi Rahab aguasa rupi oiko vae oyembojupiuka jembiapo reta rupi, Israel pegua ñee jerajaa reta omboresive yave jo pe, jare omondo ye ambuae tape rupi yave.

²⁶ Echa yanderete jekovembae, omano ma ko. Jökorai vi mborogüɨrovia jembiapo oyekuaambae, mbaeä etei ko.