SALMOS 99 - Biblia Guarani Tumpa Iñee

SALMO 99 YandeYa jupi Israel iñemuña reta kotɨ

¹ ¡YandeYa ko mburuvicha guasu! Torɨrɨi tëta reta; ¡jae güɨnoi iguapɨa, araɨgua querubín reta iä ipäu pe vae! Tokana opaete ɨvɨ.

² YandeYa ko Sión pe tuichagüe vae; tuichagüe yae ko opaete tëta reta re.

³ Toyemboete jee, kɨɨyea yae vae jare tuicha yae vae. ¡Tumpa ko Iyoambae!

⁴ Nde ko jae mburuvicha guasu imbaepuere yae vae, mbaejupi reaɨu vae, nde ko reyapo isɨmbi vae. Nde ko reyapo jupi vae jare isɨmbi vae Jacob iñemuña reta pe.

⁵ ¡Pembotuicha yandeYa Tumpa, peyetavatɨka petindɨasi reve jóvai! ¡Tumpa ko Iyoambae!

⁶ Moisés jare Aarón ñogüɨnoi isacerdote reta ndive; jare Samuel oï ombaemboete vae reta ndive. YandeYa ombopo yepi jae reta iyerure.

⁷ Amapɨtu jɨsɨ vae güi jae imiarise jae reta ndive, jare jae reta oyapo yepi, jae mborookuai omee chupe reta vae.

⁸ Nde oreYa Tumpa, ¡iyerure rembopo yepi chupe reta! Nde neɨ̈ro yepi chupe reta, ërei jembiapo ikavimbae vae re reiporarauka yepi chupe reta.

⁹ Pembotuicha yandeYa Tumpa, ¡peyetavatɨka chupe iɨvɨtɨ oñeñono tee vae jóvai! ¡YandeYa Tumpa ko Iyoambae!