SALMOS 98 - Biblia Guarani Tumpa Iñee

SALMO 98 Mbaemboete Tumpa jupi ko vae re

¹ ¡Petairari yandeYa pe tairari ipɨau vae, echa oyapo jeta mɨakañɨ reta! ¡Oporomoamɨri imbaepuere tuichagüe jare ikɨambae rupi!

² YandeYa oechauka iporogüɨroasayepe, imbaejupi oechauka opaete tëtaguasu reta jesa róvai;

³ imaendúa iporoparareko re jare iñee re Israel iñemuña reta kotɨ vae re. ¡Opaete ɨvɨ pegua reta oecha iporogüɨroasayepe!

⁴ Opaete ɨvɨ pegua reta, petairari yandeYa pe peyerovia reve, pesapúkai jare peyepopete petairari salmo reta.

⁵ Petairari salmo reta yandeYa pe arpa ndive, arpa ndive petairari.

⁶ Petairari mimbɨguasu reta iñee ndive jare vecha kuimbae-räti iñee ndive, mburuvicha guasu yandeYa jóvai.

⁷ Tijɨapu ɨguasu jare tijäsémbai opaete pɨpegua reta, jökoraiño vi ɨvɨ jare opaete pɨpegua reta;

⁸ toyepopete ɨ̈aka reta, tosapúkai ɨvɨtɨ guasu reta oyerovia reve,

⁹ jókuae yandeYa ou oï vae pe. ¡Echa, jae ou oï vaerä mburuvicha guasurä kuae ɨvɨ pe, güɨroata vaerä jupi rupi jare isɨmbi rupi tëta reta kuae ɨvɨ pegua!