SALMOS 97 - Biblia Guarani Tumpa Iñee

SALMO 97 ¡YandeYa ko Mburuvicha guasu!

¹ ¡YandeYa jae ko Mburuvicha guasu! ¡Toyerovia opaete ɨvɨ! ¡Toyerovia opaete tëtaguasu reta ɨguasu jembeɨ rupigua!

² Amapɨtu pɨtumimbi vae oñova güɨnoi; iguapɨa imomɨ̈rataa jae ko mbaejupi jare añete vae,

³ tata ojo jae jenonde, jare opata oapɨ iyɨ́vɨri tovaicho reta ñogüɨnoi vae.

⁴ Iama-vera reta omboesape ɨvɨ; ¡jókuae oecha yave kuae ɨvɨ okana!

⁵ Ɨvɨtɨ guasu reta tɨkui iraitɨ rami yandeYa jóvai, kuae ɨvɨ iya jóvai.

⁶ Ara reta omoërakua jae jupi ko vae, opaete tëta reta oecha iyemboetea.

⁷ Imara reta opaete tumpa-raanga imboetea, oyemboete jókuae re vae reta. ¡Opaete tumpa-raanga reta oa jae jóvai!

⁸ CheYa Tumpa, Sión jare tëta reta Judá pegua oyerovia yae mborookuai remee vae re;

⁹ echa, nde cheYa, Tuichagüe yae ete vae ko opaete ɨvɨ re, ndetuicha yae ko opaete tumpa-raanga reta güi.

¹⁰ Pe reta, yandeYa peaɨu vae reta, peröɨro ikavimbae; jae oyangareko chupe oñeñono tee vae reta re; jae oepɨ iyoa vae reta ipo güi.

¹¹ Tembipe oyekuaa jupi vae reta peguarä, jare yerovia katu ipɨa jupi vae reta peguarä.

¹² ¡Kuimbae jupi vae reta, peyerovia katu yandeYa re! ¡Pemboete jee ikɨambae!