SALMOS 96 - Biblia Guarani Tumpa IñeeSALMO 96 Tairari mbaemboete pegua ( 1 Cr 16.23-33 ) 1 Petairari yandeYa pe, tairari ipɨau vae; petairari yandeYa pe, opaete ɨvɨ ipo reta. 2 Petairari yandeYa pe, pemboete jee; pemoërakua ara ñavo iporogüɨroasayepe. 3 Pemoërakua opaete tëtaguasu rupi iyemboetea, jare opaete tëta reta rupi jembiapo oporombopɨakañɨ vae, 4 echa yandeYa tuicha yae ko, jupi ko oyemboete yae vaerä; ¡ikɨɨyea yae ko opaete tumpa-raanga reta güi! 5 Echa opaete tëta reta itumpa-raanga reta, mbae iäño ko, ërei yandeYa ko oyapo ara reta. 6 ¡Oime mbaemboete jare yembotuicha jae jóvai! ¡Oime mbaepuere jare yemboete o mbaemboetea pe! 7 Opaete tëta reta ɨvɨ pegua, pemee mbaemboete yandeYa pe, pemee yandeYa pe mbaemboete, pere chupe: “¡Imbaepuere vae ko nde!” 8 Pemee mbaemboete yandeYa pe, echa jupi ko oñemee vaerä chupe; peru mbota reta, peike joka pe. 9 Pemboete yandeYa, o mbaemboetea ipöra yae vae pe. ¡Peipoɨu chugüi, opaete ɨvɨ pegua reta! 10 Pere tëtaguasu reta rupi: “¡YandeYa ko jae mburuvicha guasu!” Jae oñono jenda pe kavi kuae ɨvɨ, agüɨye vaerä omɨi; jae ko güɨroata kuae tëta reta jupi rupi. 11 ¡Toyerovia ara reta jare ɨvɨ! ¡Tijɨapu ɨguasu jare opaete pɨpegua reta! 12 ¡Toyerovia kaa reta jare opaete pɨpegua reta! ¡Tosapúkai oyerovia güi opaete ɨvɨra reta ñana rupigua, 13 jókuae yandeYa ou oï vae jenonde! ¡Jae ou oï vaerä mburuvicha guasurä kuae ɨvɨ pe, güɨroata vaerä jupi rupi jare añete vae rupi tëta reta kuae ɨvɨ pegua! |
Biblia DC Guaraní Bolivia © Bolivian Bible Society, 2001.
Bolivian Bible Society