SALMOS 95 - Biblia Guarani Tumpa Iñee

SALMO 95 Tairari yasoropai pegua jare mbaemboete pegua

¹ Peyu, yatairari yayerovia reve yandeYa pe; täta yatairari ñaneovatu vae jare yandereroasayepe vae pe.

² Yaja jae jóvai mbaemboete ndive, yamboete tairari rupi.

³ Echa yandeYa, jae Tumpa tuicha yae vae, mburuvicha guasu tuicha yae vae opaete tumpa-raanga reta güi.

⁴ Jae imbae ko ɨvɨtɨ ɨvate yae vae reta. Jae oime güɨnoi mbaepuere ɨvɨ kɨ̈pe yae vae re,

⁵ ɨguasu, jae imbae ko, echa jae ko oyapo; ¡ɨvɨ otini vae, jae imbae ko!

⁶ Peyu, yambaemboete jare yayetavatɨka yandetɨndɨasɨ reve; yayetavatɨka yandeApoa yandeYa jóvai.

⁷ Echa jae ko ñaneTumpa; yande tëta imbae vae reta, ikapii jokɨ katúa pegua, jare vecha reta jae ipo pegua. Añave peendu yave iñee:

⁸ “Agüɨye pepɨa pemotäta, Meriba pe rami; ani jókuae ara Masah pe rami ñuu pe,

⁹ peñemuñagüe reta oipota tëi oyavɨuka chevea pe, chemboaporova reta, yepe oecha reta tëi ayapogüe.

¹⁰ Cuarenta año chearasɨ aiko kuae tëtaguasu kotɨ, jare jae: ‘Kuae tëta ipɨa güɨrave yae, ¡jare mbaetɨ oikuaa reta cheporookuai!’

¹¹ Jáeramo, chearasɨ reve jae: ‘Mbaetɨta oike reta mbutuu ameeta vae pe.’ ”