SALMOS 94 - Biblia Guarani Tumpa Iñee

SALMO 94 YandeYa ko jae oporojäa vae

¹ ¡CheYa, Tumpa oyepɨ ikavimbae iyapoa reta re vae, Tumpa oyepɨ ikavimbae iyapoa reta re vae, eyeechauka!

² Ɨvɨ pe oporojäa vae, epüa; eiporarauka ipɨayemboete vae reta pe.

³ CheYa, ¿kërai yave regua pa iyoa vae reta oyerovia katuta?

⁴ ¿Kërai yave regua pa jeita mbae jasɨ katu vae, jare oyemboeteta iyé ikavimbae iyapoa reta?

⁵ CheYa Tumpa, güɨrekoasɨ katu ndembae vae reta, ¡omomichi ndembae vae reta!

⁶ Oyuka reta imemano vae jare ketɨgua, tɨ̈reɨ oyuka reta vi.

⁷ Jei reta: “Tumpa mbaetɨ ko oecha, Jacob iTumpa oikuaaä ko kuae regua.”

⁸ ¡Pe mbaetɨ pearakuaa vae reta, pearakuaa mo peyeupe! Pe mbaetɨ pearakuaa vae reta, ¿kërai yave pa pearakuaata ma peyeupe?

⁹ Apɨsa iyapoa ¿oendu potaä yera? Tesa iyapoa ¿oecha potaä yera?

¹⁰ Tëtaguasu reta oinupa vae, ¿oporonupa potaä yera? ¿Oikuaa potaä yera, omboe kuimbae reta arakuaa re vae?

¹¹ YandeYa oikuaa kuimbae reta iyemongeta, oipotagüeño oyemongeta reta vae.

¹² CheYa Tumpa, toyekou jókuae kuimbae, nde rembosɨmbi vae, jare ndeporookuai reta re remboe vae,

¹³ ipɨagüive vaerä ou yave ara ikavimbae vae, ërei jeko kavimbae peguarä oyeyoo ɨvɨkua.

¹⁴ YandeYa ngaraa oeya imbae vae reta, ngaraa oeya iyangarekoambae imbae vae reta.

¹⁵ Oime yeta mbaejupi, jare opaete ipɨa jupi vae reta omomoeta.

¹⁶ ¿Kia pa chereepɨta jeko kavimbae reta güi? ¿Kia pa chereepɨta ikavimbae iyapoa reta güi?

¹⁷ YandeYa mbaetɨ yave mona chemborɨ, amanota tëi ma ko.

¹⁸ “Jaema agüɨapi” jae cheyeupe yave, ndeporoparareko chemborɨ, cheYa.

¹⁹ Jeta yemongeta ou chepɨa pe vae ipɨte pe, ndeporombopɨakatu chemboyerovia.

²⁰ Oporojäa kavimbae reta ïruä ko nde, güɨrova reta mborookuai iyeupe oyapo vaerä ikavimbae.

²¹ Oyomboatɨ reta oyemongeta jupi vae jekove re, jare omometei reta yemongeta, oyuka vaerä jekombae vae.

²² Ërei cheYa ko cheñepɨ̈roa, cheTumpa ko jae ɨ̈vavira añepɨ̈ro jese vae.

²³ Jae ko omboyevɨta jeko aeño iyoa vae reta re. ¡YandeYa Tumpa ko opata omokañɨtei reta!