SALMOS 92 - Biblia Guarani Tumpa IñeeSALMO 92 Tairari mboromboete pegua 1 OreYa, Tuichagüe yae vae, ¡ikavi yae ko mbaemboete oyeapo ndeve vae, jare rotairari tairari mboromboete pegua ndeve vae! 2 ¡Ikavi yae ko romoërakua ndeimbove yave jare kaaru yave, ndeporoaɨu re jare ndeporoangareko avei re, 3 arpa rami vae ndive oyembopu reve, ngitara ndive jare arpa ipu mbegüe jare ipu pöra pe! 4 ¡Echa chemboyerovia nderembiapo reta rupi, cheYa Tumpa! ¡Ayerovia güi atairari nderembiapo reta re! 5 CheYa Tumpa, ¡nderembiapo reta oremopɨakañɨ yae ko! ¡Ndeyemongeta roupitɨ rapeä ko! 6 ¡Jaeño kuimbae mbaetɨ iyarakuaa vae reta mbaetɨ oikuaa kuae regua! 7 Iyoa vae reta okuakuaa ñana rami, jare yogüɨreko kavi yave, okañɨtei jekuae avei pegua vaeräño ko. 8 Ërei, nde cheYa, Tuichagüe yae jekuae avei vae ko. 9 Echa añetete, nderovaicho reta opata ko okañɨtei; opata oñemoai moai ikavimbae iyapoa reta. 10 Ërei nde, remoïru chepɨ̈rata, toro ipɨ̈rata rami, reñono olivo iasaite ikäti kavi vae cheäka re. 11 Aecha, kërai ñamɨri cherovaicho reta, ¡Aendu jeko kavimbae reta oñemopüa chekotɨ vae jäse! 12 Jupi vae reta ipotɨ karandaɨ rami, okuakuaa ɨ̈vɨrare Líbano pegua rami. 13 Temitɨ rami ñogüɨnoi yandeYa jo pe, yandeYa jo joka pe ipotɨ reta. 14 Yepe indechi tëi, ërei iata; oikove katu avei jare jokɨ katu avei, 15 omoërakua reta vaerä cheYa cheñepɨ̈roa isɨmbi ko vae, jare mbaetɨ oñeväe jese jupimbae vae. |
Biblia DC Guaraní Bolivia © Bolivian Bible Society, 2001.
Bolivian Bible Society