SALMOS 90 - Biblia Guarani Tumpa Iñee

LIBRO IV SALMOS (90—106) SALMO 90 Tumpa ko oikove avei jare kuimbae mbaetɨ oikove avei

¹ OreYa, nde reiko oreve oreñepɨ̈rokarä, jekuae kuae avei rupi.

² Arakae, ndei ɨvɨtɨ reta oyeapo mbove güive voi ma, ndei kuae ɨvɨ oyeapo güive voi ma, arakae güive jare arakae regua jekuaekuae avei rupi, nde ko Tumpa.

³ Reraja ye kuimbae reta ɨvɨkuirä, rere yave: “Pekua ye ɨvɨkuirä, kuimbae reta.”

⁴ Echa, mil año vae, nderesa róvai, kárumbo vae ramiño ko. Ani mbovɨ ora pɨ̈tu yave vae ramiño ko.

⁵ Reraja kuimbae reta, ɨ ipɨ̈rata vae oporogüɨraja rami, mbaɨu ramiño ko kuimbae reta; ñana ramiño ko,

⁶ ndeimbove yave oë jare ipotɨ, ërei kaaru yave joo jëogüe jare opa ipiru.

⁷ Ndearasɨ opa oremboai, ¡opa orembopɨajopa!

⁸ Oreyoa reñono nderesa róvai, royapo vɨarigüe reñono nderesa róvai.

⁹ Añetete, iyapɨ ko orerekove ndearasɨ jeko pegua; año reta roikove vae kuimbae iä-yekɨi ramiño ko.

¹⁰ Setenta año rupiño roikove, oikove katu vae retaño oupitɨ ochenta; ërei jeseve, yemoambeko yae jare yavai yae ko, echa ɨmambae yae oasa, yaveve etei rami.

¹¹ ¿Kia pa oikuaa yavaete yae ko ndearasɨ vae? ¿Kia pa oikuaa kërai ko nde ndearasɨ yave vae?

¹² Oremboe toromae kavi orerekove re, orearakuaa katu vaerä oreyeupe.

¹³ OreYa, eyerova orekotɨ, ¿kërai yave pa reyerova yeta? ¡Oreparareko, ore nderembiokuai reta!

¹⁴ Oremoangapɨɨ ndeporoparareko pe ndeimbove yave, royerovia reve rotairari vaerä roikove roiko ramboeve.

¹⁵ Oremboyerovia katu, jeta reiporarauka oreve rami, ɨma año rupi roiporara rami.

¹⁶ ¡Eechauka nderembiokuai reta pe nderembiapo, jare taɨ reta pe eechauka ndeyemboetea!

¹⁷ YandeYa Tumpa tipɨakavi yandeve. ¡Tipɨakatu yandeve yandeYa, yanderembiapo reta re! ¡Tipɨakatu yandeve, yanderembiapo reta re!