SALMOS 9 - Biblia Guarani Tumpa Iñee

SALMO 9 Mbaemboete Tumpa pe jupi oyapo vae re

¹ Romboeteta cheYa, opaete chepɨa ndive chemiarita mɨakañɨ reta reyapogüe re.

² CheYa Tuichagüe yae vae, ¡ayerovia yae jare ayekou yae nderé! ¡Atairarita nderee re!

³ Cherovaicho reta otekuarai ndegüi, oyepɨaka reta jare omano reta nderóvai.

⁴ Echa reyapo cheve jupi vae jare chereepɨ, reguapɨ ndeguapɨa pe, reporojäa jupi rupi.

⁵ Reiporarauka tëtaguasu reta pe, jeko pɨ̈chɨi vae opa remokañɨtei, ¡opaetei remokañɨtei jekuae avei pegua!

⁶ Tovaicho reta omano, jëta guasu reta opa oyemboai chugüi reta, nde opa remboai, mbaetɨ etei mbae yepe opɨta, kia imaendúa vaerä jese reta.

⁷ Ërei cheYa ko mburuvicha jekuae avei vae, oñono iguapɨa oporojäa vaerä.

⁸ Jae oporojäata ɨvɨ re jupi rupi, jare tëta reta re isɨmbi rupi.

⁹ YandeYa oyangarekota paravete vae re, jese oñepɨ̈rota paravete vae mbɨatɨtɨ iara pe.

¹⁰ CheYa Tumpa, nderé oyekota ndekuaa vae reta, echa mbaetɨ reeya ndereeka vae reta.

¹¹ Sión pegua reta, petairari yandeYa pe; pemoërakua tëta reta pe jembiapo re.

¹² Echa Tumpa mbaetɨ iñakañɨ oporoyuka vae reta güi, mbaetɨ iñakañɨ oiporara vae reta isapúkai güi.

¹³ Cheparareko cheYa, emae kërai oiporarauka cheve chemotareɨ vae reta. ¡Cherenoe kuae mano ipo güi!

¹⁴ Chemiari vaerä ndeño ipuere ndemboete vae. Tëta guasu Sión jöke pe amoërakuata. Ayerovia, echa nde chereroasayepe.

¹⁵ Tëtaguasu reta opa oa, jae reta oyoo ɨvɨkua vae pe, jae reta ñuai oñono vae pe oa.

¹⁶ YandeYa oyekuaauka chupe reta. ¡Jae oyapo jupi vae! Jeko pɨ̈chɨi vae reta opa oyepɨɨ, jae reta ñuai oyapo vae pe yeño oa reta.

¹⁷ Jeko pɨ̈chɨi vae reta, opaete vae iñakañɨ Tumpa güi vae, oyererajaukata omanogüe reta ñogüɨnoia pe.

¹⁸ Ërei ngaraa iñakañɨ paravete vae reta güi, ngaraa vi paravete vae reta oiporara avei yogüɨreko.

¹⁹ Epüa, cheYa, agüɨye emaeño kuimbae reta toyembotuicha. ¡Ejäa tëtaguasu reta!

²⁰ Eiämondo reta cheYa, ¡toikuaa jae reta kuimbaeño ko vae!