SALMOS 86 - Biblia Guarani Tumpa Iñee

SALMO 86 Yerure oimeño vaerä Tumpa iporoparareko

¹ CheYa Tumpa, emboɨke ndeapɨsa jare eyeapɨsaka cheré, echa chepɨatɨtɨ yae jare cheparavete aï;

² cheövatu, echa jupi rupi ko aiko nderóvai. Nde ko cheTumpa; ¡che nderembiokuai ayeko nderé vae, chereroasayepe!

³ CheYa Tumpa, cheparareko, echa ara ñavo ayerure avei ko ndeve.

⁴ CheYa Tumpa, che nderembiokuai, chemboyerovia, echa ayerure ko ndeve.

⁵ Echa nde cheYa, ndepɨakavi jare neɨ̈ro vae ko; ndeporoparareko tuicha yae ko nereenɨi vae reta kotɨ.

⁶ CheYa Tumpa, eyeapɨsaka cheyerure re, ¡eïndaivi eï cheñee amoëta romoñera reve vae re!

⁷ Chepɨatɨtɨ aï yave roenɨi, echa nde reendu cheve vae ko.

⁸ CheYa Tumpa, ¡mbaetɨ tumpa-raanga reta güi metei ave nde rami vae! ¡Nderembiapo ave mbaetɨ omboyovake vae!

⁹ Opaete tëtaguasu reta nde ko reyapo, yogüeruta omee mbaemboete ndeve cheYa, jare omboete yae retata nderee.

¹⁰ Echa nde ko Tumpa tuicha yae ete vae, ¡mɨakañɨ iyapoa! Mbaetɨ yé ïru Tumpa.

¹¹ CheYa Tumpa, chemboe aguata vaerä nderemimbota rupi, aiko vaerä jupi rupi nderóvai; eñono kavi chepɨa, amboete vaerä nderee.

¹² CheYa Tumpa, toromboete opaete chepɨa ndive, tamboete nderee jekuae avei rupi.

¹³ Echa ndeporoparareko tuicha yae ko chekotɨ, ¡reroasayepe cherekove omanogüe reta ñogüɨnoia pe aja vaerägüe!

¹⁴ CheRu Tumpa, ipɨapochɨ vae reta oñemopüa chekotɨ, oyomboatɨ oyemongeta reta cheyuka vaerä, mbaetɨ etei oipoɨu reta ndegüi.

¹⁵ Ërei nde cheYa, Tumpa iporoparareko yae vae, mbaetɨ iyarasɨ raivi vae, tuicha iporoparareko jare añete vae ko.

¹⁶ Emae cheré, ¡cheparareko! ¡Emee mbaepuere che nderembiokuai pe! ¡Cheövatu, che nderembiokuai kuña imembɨraɨe!

¹⁷ Eyapo che ndive kañɨmaa ikavigüe vae, toecha chemotareɨ vae reta jare timara reta, echa, ¡nde ko cheYa Tumpa, chemborɨ jare chembopɨakatu!