SALMOS 85 - Biblia Guarani Tumpa Iñee

SALMO 85 Yerure Tumpa iporoparareko re Israel peguarä

¹ CheYa Tumpa, ndeporoparareko yae ko kuae tëtaguasu ndembae vae re; reru ye tembipɨɨ güi Jacob iñemuña reta;

² neɨ̈ro ko ndembae vae reta pe ikavimbae oyapogüe re, jare opaete iyoa reta re;

³ rembosɨrɨ ndeyeugüi opaete ndearasɨ yae vae.

⁴ CheRu Tumpa, orereroasayepe vae, ¡oremopüa pɨau ye! ¡Ndearasɨ poi mo orekotɨ!

⁵ ¿Ndearasɨta ra reiko orekotɨ jekuae avei rupi? ¿Ndearasɨ aveita ra reiko jekuae avei pegua?

⁶ ¿Ngaraa ma ra remee roikove ye vaerä, ndembae vae reta oyerovia katu ye vaerä nderé?

⁷ CheYa Tumpa, ¡eechauka ndeporoparareko oreve jare orereroasayepe!

⁸ Ayeapɨsakata aï cheYa Tumpa jeita vae re; echa imiarita mbɨakatu, imbae vae reta pe jare jupi rupi yogüɨreko vae reta pe, agüɨye vaerä ma oyerova ye ikavimbae kotɨ.

⁹ Añetete, köiño yae oï Tumpa iporogüɨroasayepe, oipoɨu chugüi vae reta peguarä, iyemboetea oiko vaerä yandeɨvɨ pe.

¹⁰ Mboroparareko jare añete vae oñoväe, mbɨakatu jare jupi vae oñoküava,

¹¹ añete vae jeñɨita ɨvɨ güi, mbaejupi outa ara güi.

¹² YandeYa Tumpa ombouta ama, jare yandeɨvɨ pe oimeta mbaagüɨye.

¹³ Mbaejupi ojota jae jenonde, jare oyapo kavita yanderaperä.