SALMOS 84 - Biblia Guarani Tumpa Iñee

SALMO 84 Tumpa jo oipota yae vae

¹ ¡Ikavi yae ko reikoa, cheYa Tumpa Imbaepuere yae ete vae!

² ¡Aipota yae jare chekɨ̈reɨ yae aï vaerä nderoka pe, cheYa! ¡Opaete chepɨa ndive atairari ayerovia reve Tumpa oikove vae pe!

³ Güɨra raɨ ave oväe jorä jare tapérai jaitɨrä, omboa vaerä pɨpe ndembae mɨmba oyeapɨ jese vae oïa pe, cheYa Imbaepuere yae ete vae, cheruvicha guasu, cheRu Tumpa.

⁴ ¡Oyerovia ko, ndero pe yogüɨreko vae, jókuae ndemboete avei reta vae!

⁵ ¡Oyerovia ko, kuimbae nderé ipɨ̈rata vae, jókuae ipɨa pe güɨnoi reta kɨ̈reɨ ngatu oguata vaerä vae!

⁶ Oasa ɨvɨtɨ päu ipe kavi Yaeo Renda jee vae yave, oipoepɨ reta ɨesaɨ pe, ama omotɨnɨe vi ɨ jɨru reta,

⁷ okuakuaa retata imbaepuere jare oecha retata Tumpa, Sión pe.

⁸ CheYa Tumpa Imbaepuere yae ete vae, ¡eendu cheyerure! ¡Jacob iTumpa, eyeapɨsaka!

⁹ CheRu Tumpa, oreyeopiaka, emae kavi nderembiparavo re.

¹⁰ ¡Echa ikavi yae ko aï vaerä metei ara nderoka pe, jeta ara ikatu rupi aiko vae güi! Ikavi ko aiparavo aiko vaerä tupao jöke järoarä mbaeyoa ipɨte pe aiko vae güi.

¹¹ Echa yandeYa Tumpa ko omboesape jare oporoepɨ vae; jae omeeta mboroaɨu jare mboromboete, ngaraa opɨ̈ro mbae ikavi vae, ipɨa jupi rupi oguata vae güi.

¹² CheYa Tumpa Imbaepuere yae ete vae, ¡oyerovia ko jókuae nderé oyeko vae!