SALMOS 83 - Biblia Guarani Tumpa Iñee

SALMO 83 Yerure okañɨtei vaerä Israel iñemuña reta jovaicho

¹ CheRu Tumpa, ¡agüɨye kïriiño eï! ¡Agüɨye kïrii epɨta nderenda pe neñeembae!

² Echa, ko nderovaicho reta jäsémbai osapúkai, nemotareɨ vae reta oñemopüa ndekotɨ.

³ Oyapo vɨari reta yemongeta ikavimbae tëta ndembae kotɨ, ¡oyemongeta kaviä nderembiangareko reta kotɨ!

⁴ Jei reta: “Peyu opa ñamokañɨtei, agüɨye vaerä ma oiko tëtaguasurä, agüɨye ye toyeendu Israel jee.”

⁵ Echa oyomboatɨ oyapo reta yemongeta metei ramiño, oñomoïru reta oñemopüa ndekotɨ,

⁶ jae ko: Edom jare Ismael iñemuña reta, Agar jare Moab iñemuña reta,

⁷ Gebal, Amón jare Amalec, filisteo reta jare Tiro pegua reta,

⁸ oñemoïru vi jae reta ndive Asiriaɨgua reta; kuae reta ko Lot iñemuña reta ipɨ̈rata yae jese vae.

⁹ Eyapo chupe reta Madián pegua reta pe reyapo rami, Sísara pe reyapo rami; ɨesaɨ Cisón pe reyapo Jabín pe reyapo rami,

¹⁰ Endor pe opa okañɨtei reta, jare jetegüe opa oyea ɨvɨ ndive tepoti rami.

¹¹ Eyapo isundaro ruvicha reta pe, mburuvicha reta Oreb jare Zeeb pe reyapo rami; jare eyapo opaete juvicha reta pe, mburuvicha reta Zeba jare Zalmuna pe reyapo rami,

¹² echa jei reta: “Yayapo yandembaerä Tumpa oikoa.”

¹³ CheRu Tumpa, eyapo chupe reta kusumirou güɨroveve ɨtɨ rami, ñana joogüe ɨvɨtu opa güɨroveve rami;

¹⁴ jare tata opa oapɨ ɨvɨtɨ vae rami, tata opaetei kaa omboasavi oeya vae rami.

¹⁵ ¡Jökorai eaɨkuemoña reta neama ɨvɨtuai reve vae pe, jare eiämondo reta nekusumirou pe!

¹⁶ CheYa, ¡emomaraiuka reta, ndereeka reta vaerä!

¹⁷ Timara jare tipɨa jopa topɨta reta jekuae avei pegua; ¡toñemomaraiuka reta jare tomano reta!

¹⁸ ¡Toikuaa reta nde jae ko Tumpa vae, ndeño ko jae Tuichagüe yae ete opaete ɨvɨ re vae!