SALMOS 82 - Biblia Guarani Tumpa Iñee

SALMO 82 Tumpa ko mburuvicha tuichagüe oporojäa vae

¹ Tumpa oï imbaepuere vae reta ipɨte pe, omombeu vaerä ikotɨ reta mbae oikota vae:

² “¿Kërai yave regua pa mbaetɨta peporojäa kavi, jare peepɨ iyoa vae reta?

³ ¡Peyapo jupi vae ipuerembae pe jare tɨ̈reɨ pe! ¡Peyapo jupi vae ipɨatɨtɨ vae pe, jare mbae re oata vae pe!

⁴ ¡Peroasayepe ipɨatɨtɨ vae jare mbae re oata vae, peroasayepe iyoa vae reta ipo güi!

⁵ Ërei ngatu pe reta mbaetɨ peikuaa; peiko pɨtumimbi pe rami. Okana opaete ɨvɨ iguapɨka reta.

⁶ Che jae: Pe reta ko jae tumpa reta, opaete pe reta, Tuichagüe yae ete vae taɨ reta.

⁷ Ërei ngatu pemanota oipotagüe kuimbae omano rami, ¡oipotagüe mburuvicha oa ramiño vi peata!”

⁸ ¡CheRu Tumpa, epüa ejäa ɨvɨ, echa nde ko jae opaete tëtaguasu iya!