SALMOS 81 - Biblia Guarani Tumpa Iñee

SALMO 81 Tumpa iporoparareko jare Israel iñemuña reta jeko kavimbae

¹ ¡Petairari pevɨa katu reve Tumpa pe, ñanemopɨ̈rata vae pe! ¡Pemboete pesapúkai yerovia katu reve Jacob iTumpa!

² Petairari reve pembopu angúa raɨ, arpa ikavi yae ipu vae jare ngitara.

³ Pemoñee mimbɨguasu yasɨ pɨau pe, jare yasɨ jova guasu yave; jae ko yandearete mbaemboete pegua iara,

⁴ echa jae ko mborookuai Jacob iTumpa omee, Israel iñemuña reta peguarä vae.

⁵ Jae ko mborookuai oñemee José pe vae, Tumpa oiporarauka Egiptoɨgua reta pe yave. Aendu ñee aikuaambae vae jei körai:

⁶ “Ambogüeyɨ voɨta ndeatiɨ güi, ndepo reta opoi mbaravɨkɨ ipoɨ vae güi.

⁷ Resapúkai reyerure mbɨatɨtɨ iara pe jare che roepɨ; amboyevɨ ndeve ararɨapu rupi; rojäa ɨ Meriba jembeɨ pe.

⁸ Peyeapɨsaka, tëta chembae, amombeu kavi voita peve. ¡Israel, eendu cheñee!

⁹ Agüɨye enoi tumpa ambuae reta, agüɨye vi emboete tumpa ambuae reta.

¹⁰ Che ko jae ndeYa Tumpa, ɨvɨ Egipto güi nerenoe vae, eyurupeka jare toromoangapɨɨ.

¹¹ Ërei tëta chembae vae mbaetɨ oipota oyeapɨsaka cheñee re; ¡Israel, mbaetɨ oipota oyapo che jae vae!

¹² Jáeramo amaeño oyapo reta ipɨa jemimbota, yogüɨreko reta iyemongeta ae rupi.

¹³ ¡Tëta chembae vae oyapo yave mona che jae vae! ¡Israel, oguata yave mona cheremimbota rupi,

¹⁴ aramoete ko opata tëi amoamɨri chupe jovaicho reta, aiporaraukata tëi ko jókuae jovaicho reta pe!”

¹⁵ YandeYa imotareɨa reta opata tëi ko iñamɨri, jökoraita tëi opɨta reta jekuae avei pegua.

¹⁶ Tumpa omongaruta viña imbae vae reta trigo ikavigüe pe, jare ei ñana rupigua pe omoangapɨɨta tëi ko.