SALMOS 80 - Biblia Guarani Tumpa IñeeSALMO 80 Yerure ñemopüa pɨau regua 1 Eyeapɨsaka Israel iñemuña reta iyangarekoa, nde reyangareko José re vecha re oyeangareko rami vae, nde reiko araɨgua querubín reta iä ipäu pe vae, 2 ¡Emae kavi Efraín, Benjamín jare Manasés re! ¡Epa, javoi eyu orereroasayepe! 3 CheRu Tumpa, ¡oremopüa pɨau ye! ¡Emae kavi oreré jare orereroasayepe! 4 CheYa Tumpa Imbaepuere yae ete vae, ¿kërai yave regua pa ndearasɨta ndembae vae reta iyerure kotɨ? 5 Oremongaru mbatee ma tesaɨ pe; oremboɨu mbatee ma tesaɨ re. 6 Oreñono orerëta-ɨpɨ pegua reta opuka oreré vaerä, jare orerovaicho reta oreyóyai yóyai. 7 CheRu Tumpa Imbaepuere yae ete vae, ¡oremopüa pɨau ye! ¡Emae oreré, jare orereroasayepe! 8 Egipto güi reru temitɨ uva; opa renoe remombo tëtaguasu reta, jare joko pe reñotɨ jókuae uva. 9 Reitɨo kavi jendarä, remboyepota japo reta, jare omotɨnɨe iɨvɨ. 10 Jembo opa oñova ɨvɨtɨ reta, jäka reta oñova ɨ̈vɨrare ɨvategüe. 11 Jembo jokɨ pɨau vae ojoi oväe ɨguasu pe, jare jeñɨi vae ɨ̈aka Éufrates pe. 12 ¿Maera pa ikësea opa remboai, jare remaeño oipoo iagüe, jokoropi oasa vae reta? 13 Taitetu opaetei omopë mopë; ¡jare mɨmba ñana rupigua opa jou! 14 CheRu Tumpa Imbaepuere yae ete vae, eyapo ikavi vae, eyu ye; emae ara güi jare eyemongeta remborɨ vaerä kuae uva, 15 temitɨ nde reñotɨ ndembaepuere rupi vae, rembojokɨ ndeyeupe vae. 16 Opaetei ókai oï, opa oyemboai, emokañɨtei ndearasɨ rupi iyasɨaa jare japɨa reta. 17 Ërei toï ndembaepuere kuimbae re, jókuae kuimbae reiparavo ndeyeupeguarä vae re, 18 jökorai ngaraa ye ma rosɨrɨ ndegüi. ¡Emee toroikove jare ndereeño romboeteta! 19 CheYa, Tumpa Imbaepuere yae ete vae, ¡oremopüa pɨau ye! ¡Emae oreré jare orereroasayepe! |
Biblia DC Guaraní Bolivia © Bolivian Bible Society, 2001.
Bolivian Bible Society