SALMOS 8 - Biblia Guarani Tumpa Iñee

SALMO 8 Tumpa iyemboetea jare kuimbae iyembotuicha

¹ OreYa Tumpa, ¡imboetea yae ko nderee opaete ɨvɨ rupi! ¡Reñono ndeyemboetea ara re!

² Michia reta rupi jare okambu vɨteri vae reta rupi remboyekuaa ndembaepuere nderovaicho reta jeko pegua. Remokïrii vaerä nderovaicho reta jare iyepɨse vae reta.

³ Aecha yave ara, ndepo pe reyapogüe, yasɨ jare yasɨtata reta reñono jese vae,

⁴ jae: “¿Mbae pa ko kuimbae, reyemongeta vaerä jese? ¿Mbae pa ko kuimbae reyemoambeko vaerä jese?”

⁵ Remomichi nunga araɨgua reta güi, jare remee chupe yemboetea jare mbaepuere.

⁶ Jare reñono reyapogüe reta re; opaete reñono ipo pe:

⁷ Vecha reta jare güeye reta, jaeramiño vi opaete mɨmba kaa rupigua,

⁸ güɨra reta jare jevae reta ɨguasu rupigua; opaete mbae ɨguasu rupigua.

⁹ OreYa Tumpa, ¡tuicha yae ko nderee opaete ɨvɨ rupi!