SALMOS 79 - Biblia Guarani Tumpa Iñee

SALMO 79 Mbɨatɨtɨ Jerusalén oyemboai vae re

¹ ¡CheRu Tumpa, yogüeru tëtaguasu reta ndeɨvɨ pe! ¡Omboeteä reta ndetupao oñeñono tee vae, jare Jerusalén omboai oeya reta tëtagüerä!

² ¡Nderembiokuai reta jetegüe opa omee chucha reta jembiurä, oñeñono tee ndeve vae reta jetegüe omee reta mɨmba reta ñana rupigua jembiurä!

³ Jugüɨ reta oyepɨyere opaete Jerusalén rupi ɨ rami, jare mbaetɨ kia oñotɨ reta vaerä.

⁴ Orerëta-ɨpɨ pegua reta oreyóyai yóyai vaeräño roiko, oreyóyai yóyai oreɨvɨrigua reta.

⁵ CheRu Tumpa, ¿kërai yave regua pa ndearasɨta? ¿Ndearasɨ yae aveita pa nerägüɨro jeko pegua?

⁶ ¡Eitɨ ndearasɨ tëtaguasu reta mbaetɨ ndekuaa vae reta re, jare mborookuaía reta mbaetɨ nderee omboete vae reta re!

⁷ Echa opa omokañɨtei reta Jacob iñemuña reta, jare jëtaguasu opa omboai reta.

⁸ Agüɨye eiporarauka oreve oreñemuñagüe reta iyoa re, ¡ndeporoparareko tou jarembae oreve, echa orepɨatɨtɨ yae roï!

⁹ CheRu Tumpa, orereroasayepe vae, nderee imboetea yae vae re oremborɨ; ¡orereepɨ jare neɨ̈ro oreve oreyoa re!

¹⁰ Echa tëtaguasu reta jeita: “¿Ketɨ ra oime oï iTumpa?” ¡Emee toroecha jare toikuaa opaete vae! ¡Reyepɨ nderembiokuai reta jugüɨ oyepɨyeregüe re vae!

¹¹ Eyeapɨsaka tembipɨɨ reta jäse re, eroasayepe ndembaepuere pe oyeyukauka vaerä etei ma ñogüɨnoi vae.

¹² CheRu Tumpa, eyepɨasɨ yeyé orerëta-ɨpɨ pegua reta re, ikavimbae oyapo ndekotɨ reta jare ndemboetembae re,

¹³ jare ore tëta ndembae vae reta, ndevecha reta ndekapii jokɨ katúa pegua, romee aveita yasoropai ndeve, ¡rotairarita ndeve jekuae avei rupi!