SALMOS 78 - Biblia Guarani Tumpa Iñee

SALMO 78 Tumpa jupi avei imbae vae reta kotɨ

¹ Tëta chembae vae reta, peyeapɨsaka, cheporookuai re; ¡pemboɨke peapɨsa cheñee reta kotɨ!

² Chemiarita ñee arakuaa pegua; chemiarita mbae oñemi oiko arakae güive vae re.

³ Kuae reta yaendu jare yaikuaa; echa ñaneñemuñagüe reta imiari kuae re yandeve,

⁴ agüɨye yaikuaku yanderaɨ reta güi, ñanemiari taɨkue yogüɨrekota vae reta pe, yandeYa Tumpa pe mbaemboete oñemee vae, imbaepuere yae vae re jare mɨakañɨ reta oyapogüe re.

⁵ Jae oñono iporookuai Jacob peguarä, jare oñono mborookuai Israel peguarä; kuae re oyókuai ñaneñemuñagüe reta, oikuaauka vaerä taɨ reta pe.

⁶ Oikuaa vaerä ñemuña taɨkue rupi yogüɨrekota vae reta, jare oa yeta vae reta; jókuae reta imiari yoapɨ yeta taɨ reta pe.

⁷ Tumpa reño oyeko reta vaerä, agüɨye vaerä iñakañɨ reta Tumpa oyapogüe güi; oyapo avei vaerä iporookuai reta,

⁸ agüɨye vaerä iñemuñagüe reta rami: Ipɨarai reta jare ipɨapochɨ reta, mbaetɨ metei reño iyemongeta reta. ¡Tumpa kotɨ ave mbaetɨ jupigüe oyapo reta!

⁹ Efraín iñemuña reta, uvɨ regua reta; ñeraro iara pe opa oyerova reta ye,

¹⁰ mbaetɨ omboete reta Tumpa iporogüɨrökuavee päve, mbaetɨ vi oipota reta oyapo jae iporookuai,

¹¹ iñakañɨ reta jae oyapogüe güi, jókuae mɨakañɨ oechauka chupe reta vae güi.

¹² Tumpa oyapo mɨakañɨ reta iñemuñagüe reta jóvai, Egipto pe, ɨvɨ Zoán pe.

¹³ Omboyao ɨguasu, jare güɨroasa reta mbɨte rupi, ovapetea rami ɨ oyemboatɨ opɨta.

¹⁴ Ara pe güɨroata reta metei jɨsɨ vae amapɨtu rupi, jare pɨ̈tu yave metei jɨsɨ tata omboesape chupe reta vae rupi.

¹⁵ Ñuu pe oyoka ɨ̈vavira, omoë jeta ɨ jare jou reta oatambae reve.

¹⁶ ¡Tumpa omoë ɨ ɨ̈vavira güi, oguata ɨ, ɨ̈aka pe ɨ oguata rami!

¹⁷ Ërei jeseve jae reta jekuaeñoi iyoa Tumpa kotɨ; oyembopɨapochɨ reta Tuichagüe yae ete vae kotɨ ñuu pe.

¹⁸ Echa ojäa reta Tumpa, oiporu reta jembiurä jae reta oyúe vae.

¹⁹ Imiari kaviä reta Tumpa kotɨ, jei reta: “¿Ipuereta ra yandemongaru kuae ñuu pe?

²⁰ Jae oyoka ɨ̈vavira, jare oë ɨ jeta rupi, oguata jeta ɨ; ërei, ¿ipuereta ra omee vi mbɨyape? ¿Omeeta vi ra soo imbae vae reta pe?”

²¹ YandeYa oendu jókuae yave, iyarasɨ; ¡tata jendɨ rami, iyarasɨ jendɨ Jacob kotɨ! ¡Iyarasɨ yae Israel kotɨ!

²² Mbaetɨ ramo güɨrovia reta Tumpa re, mbaetɨ vi oyeko reta iporogüɨroasayepe re ave.

²³ Ërei ngatu, jae ombou amapɨtu reta ɨvate güi, oipea ara jöke reta.

²⁴ ¡Omongɨ jese reta maná, jou reta vaerä, omee chupe reta mbɨyape ara güi!

²⁵ ¡Kuimbae jou ko tuichagüe reta jembíu! ¡Tumpa ombou chupe reta jɨ̈vɨata regua!

²⁶ Ɨvɨtu kuaraɨ oëa kotɨgua jare arayevɨ kotɨgua oyepeyu ɨvate; ¡Tumpa güeru imbaepuere ndive!

²⁷ ¡Güeru chupe reta jetagüe soo; jeta güɨra oveve, ɨguasu jembeɨ pe jeta ɨvɨkuitï rami!

²⁸ Tumpa ombou oa reta vaerä jeyupa mbɨte pe, jo guakapi pegua iyɨ́vɨri rupi.

²⁹ Jou reta jɨ̈vɨata regua, jökorai Tumpa ombopo chupe reta ipɨa jemimbota.

³⁰ Ërei ndei yangapɨɨ mbove, oimeño vɨteri jou ñogüɨnoi ramboeve,

³¹ ou Tumpa iyarasɨ jese reta, jare omokañɨtei Israel pegua kuimbae tuichagüe jare oyeparavogüe reta.

³² Ërei jeseve, jekuaeñoi iyoa reta ye; mbaetɨ güɨrovia reta Tumpa mɨakañɨ reta oyapogüe re.

³³ Jáeramo, iara omboapɨ chugüi reta jarembae pegua, jare iaño reta mbɨatɨtɨ yavaetegüe pe.

³⁴ Tumpa ombou chupe reta mano yave, jayave oyerova reta ikotɨ jare oeka reta ikueraimbae.

³⁵ Jayave imaendúa reta Tumpa Tuichagüe yae ete vae ko jae iyeepɨka, jare jae ko oepɨ reta vae.

³⁶ Ërei jei raangaiño, iñee-yukɨ reta chupe, iyapu reta chupe.

³⁷ Echa ipɨa reta mbaetɨi jupi rupi kavi Tumpa kotɨ, mbaetɨ vi morogüɨrökuavee päve oyapo reta.

³⁸ Ërei jae ko iporoparareko vae, iñɨ̈ro mbaeyoa re jare mbaetɨ oporomokañɨtei vae; ombosɨrɨ avei iyarasɨ, mbaetɨ omboyekuaa opaetei iyarasɨ.

³⁹ Imaendúa, kuimbae retaño ko vae, ɨvɨtu rami oasa jare mbaetɨ oyerova ye.

⁴⁰ ¡Mbovɨ ye rupi oyembopɨapochɨ reta ikotɨ, omboarasɨuka reta ñuu pe!

⁴¹ Oyerova reta ye jare ojäa reta Tumpa, ¡omboarasɨuka reta Iyoambae Israel pegua!

⁴² Mbaetɨ imaendúa reta, jókuae ara imbaepuere pe ko güɨroasayepe reta mbɨatɨtɨ güi vae re,

⁴³ oyapo yave mɨakañɨ tuichagüe Egipto pe, ɨvɨ Zoán pe;

⁴⁴ ɨ reta oipoepɨ yave tugüɨ pe, agüɨye vaerä oɨu reta chugüi.

⁴⁵ Ombou chupe reta mberu jare pïte, opaetei mbae güɨrokomegua.

⁴⁶ Jemitɨ reta opa vi jouka chugüi reta taso pe jare tuku reta pe, jae reta oparavɨkɨ jese vae.

⁴⁷ Iuvarupa reta opa omboai chugüi reta amandau pe, jare iɨvarupa reta opa oyuka chugüi reta iroɨ pe.

⁴⁸ Jɨmba reta opa oyuka amandau jare amañeengata.

⁴⁹ Oitɨ jese reta iyarasɨ; ombou chupe reta tembiporara jare mbɨatɨtɨ, ikavimbae omoërakua rami.

⁵⁰ ¡Omaeño iyarasɨ ou vaerä jese reta! Mbaetɨ iñɨ̈ro chupe reta, omboeterenga omano reta vaerä.

⁵¹ ¡Ombou mano opaete membɨrɨpɨ reta re Egipto pe! Cam iñemuña pegua membɨrɨpɨ reta re.

⁵² Güɨnoe imbae vae reta vecha jókai güi oñerenoe rami, jare güɨraja ñuu rupi.

⁵³ Güɨroata reta oyangareko kavi yae jese reve, jökorai agüɨye vaerä okɨɨye reta; ërei ɨguasu opa oyasoi jovaicho reta.

⁵⁴ Güeru jaɨkue rupi ɨvɨ oñono tee vae jembeɨ pe; kuae ɨvɨtɨ jae imbaepuere rupi opɨ̈ro vae pe.

⁵⁵ Jae reta jenonde güi opa güɨnoe omombo tëtaguasu reta; tɨmasa pe ojäa iɨvɨgüe jae reta imbaerä, jare jëtagüe reta omee Israel iñemuña reta yogüɨreko vaerä pɨpe.

⁵⁶ Ërei jae reta ojäa jare omboarasɨuka Tumpa Tuichagüe yae ete vae, jare mbaetɨ oyapo reta jae iporookuai;

⁵⁷ iñemuñagüe reta rami oyembopɨapochɨ reta, ¡ñape reta, güɨrapa oyepokuaa ñape rami!

⁵⁸ Mbaemboete renda ɨvɨtɨ rupigua oyapo reta vae rupi omboarasɨuka reta, jare omboete reta tumpa-raanga reta vae rupi omoägüɨrouka.

⁵⁹ Tumpa oecha kuae jare iyarasɨ yae, jare güɨröɨro yeyé Israel.

⁶⁰ Jáeramo, oeya tupao guakapi pegua Silo pe oï vae, küaraɨa guakapi pegua, pɨpe oikose kuimbae reta ipɨte pe vae.

⁶¹ Jare omee tembipɨɨrä ikäjou morogüɨrökuavee päve pegua tovaicho reta ipo pe; jae ko jókuae käjou rupi oechauka imbaepuere jare iyemboetea vae.

⁶² Omee vi tëta imbae vae reta omano vaerä kɨsepuku pe, iyarasɨ yae imbae vae reta kotɨ.

⁶³ Itaɨrusu reta opa omano tata pe, jare ikuñatai reta pe mbaetɨ ma tairari menda pegua.

⁶⁴ Isacerdote reta opa omano kɨsepuku pe, jare jembirekogüe reta mbaetɨ oäpiro.

⁶⁵ Jayave yandeYa opa, kia oke vae güi opa rami, jëia yae vae osapúkai vino omboakuvo vae rami.

⁶⁶ Jare opa omoamɨri jovaicho reta ikupe kotɨ rupi; oeya ñemomarai rupi jekuae avei pegua.

⁶⁷ Güɨröɨro José iñemuña reta, mbaetɨ oiparavo ñemuña Efraín.

⁶⁸ Jaeño oiparavo ñemuña Judá, ɨvɨtɨ Sión, jae oaɨu vae.

⁶⁹ Omopüa jo mbaemboetea jekuae avei pegua, oyapo ɨvɨ oiko avei vae rami.

⁷⁰ Oiparavo jembiokuai David, güeru vecha re oyangarekoa güi.

⁷¹ Vecha reta imembɨmii vae jaɨkue oguataa güi güeru, oyangareko vaerä tëta imbae vae re, Israel iñemuña reta re.

⁷² Jare oyangareko jese reta opaete ipɨakatu reve kavi, oyangareko jese reta ipoki rupi kavi.