SALMOS 77 - Biblia Guarani Tumpa Iñee

SALMO 77 Yemomaendúa opaete Tumpa oyapo imbaepuere rupi vae regua

¹ Tumpa pe täta yae asapúkai, asapúkai chupe, echa jae oendu cheve.

² Chepɨatɨtɨ aï yave aeka cheYa, chekueraimbae reve aupi chepo ayerure pɨ̈tu yave, ërei mbaetɨ aväe mbɨakatu.

³ Chemaendúa Tumpa re jare ayaeo; ayemongeta jare chepɨtu.

⁴ Nde cheYa, mbaetɨ remaeño ake; ¡chembopɨtu yae, mbaetɨ chepuere chemiari!

⁵ Ayemongeta ara reta jare año reta tenonde rupi vae re;

⁶ chemaendúa atairarise pɨ̈tu rupi vae re. Ayemongeta chepɨa pe jare aparandu cheyeupe:

⁷ ¿Oremombota ra oreYa jekuae avei rupi? ¿Ngaraa ye ma ra oreparareko?

⁸ ¿Opa ra chugüi iporoparareko jekuae avei pegua? ¿Opa ra chugüi iporogüɨrökuavee päve?

⁹ ¿Iñakañɨ ra Tumpa güɨnoi vaerä mboroparareko? ¿Iyarasɨ yae ete ra, mbaetɨ vaerä ma oporoparareko?

¹⁰ Jae vi: “Tumpa Tuichagüe yae ete vae mbaetɨ ma tenonde yave rami.” Kuae ou chepɨa pe jasɨ yae.

¹¹ Chemaenduata cheYa kërai mbaembae oyapogüe re, jókuae arakae yave oyapogüe re.

¹² Tachemaendúa opaete jae oyapogüe re, tachemiari opaete jókuae re.

¹³ CheRu Tumpa, ikɨambae ko opaete reyapogüe; ¿oime ra tumpa tuicha yae vae ndegüi?

¹⁴ ¡Nde ko jae Tumpa, mɨakañɨ tuichagüe iyapoa! ¡Reechauka ndembaepuere opaete tëtaguasu reta pe!

¹⁵ Ndembaepuere rupi reepɨ ndembae vae reta, Jacob jare José iñemuña reta.

¹⁶ CheRu Tumpa, ɨguasu ndereecha yave, okɨɨye, orɨrɨi ɨguasu jugua okɨɨye güi.

¹⁷ Amapɨtu güi oyepɨyere ɨ yavaetegüe; jare jɨapu ara reta, overa opaete rupi.

¹⁸ Ndeararɨapu oï kusumirou re; neama-vera omoembipe ɨvɨ jare omokana.

¹⁹ Ɨguasu rupi oï nderape; reasa jeta ɨ reta, ërei mbaetɨ kia oväe nderaɨkuere.

²⁰ Reroatase ndembae vae reta vecha rami, Moisés jare Aarón rupi.