SALMOS 76 - Biblia Guarani Tumpa Iñee

SALMO 76 Tumpa oporomoamɨri vae

¹ Tumpa regua, Judá pegua reta oikuaa kavi yae; Israel pe jërakua yae ko jee.

² Jerusalén pe oï itupao guakapi pegua, ɨvɨtɨ Sión re oï jae oikoa.

³ Joko pe opa omopë tembiporu ñeraro pegua reta: Uvɨ, güɨrapa, yeopiaka jare kɨsepuku.

⁴ ¡CheRu Tumpa, ndeyemboetea ikavi yae vae ko nde! ¡Ndetuicha yae ko opaete ɨvɨtɨ guasu reta oiko ñomai vae güi!

⁵ Ipɨatäta yae vae reta imbaembae opa oñepɨ̈ro chugüi reta; mbaetɨ etei metei ave mbae ipuere oyapo ipɨ̈rata yae vae reta, ¡opa omano reta!

⁶ CheRu Tumpa, Jacob iTumpa, nde neñeeäta yave, mbaetɨ ipuere omɨi käretou jare kavayu ave.

⁷ ¡Nde, kɨɨyea yae ko! ¿Kia pa ipuereta oyemboɨ nderóvai ndearasɨ reï yave?

⁸ Ara güi reenduka neporojäa; ɨvɨ okɨɨye jare kïrii opɨta,

⁹ repüa reporojäa vaerä yave cheRu Tumpa, jare reroasayepe opaete oiporara ɨvɨ pe vae yave.

¹⁰ Kuimbae iyarasɨ ndemboeteukata; ¡michi yae iyarasɨ vae ave ndemboeteukata!

¹¹ Peyapo ñererökuavee peYa Tumpa pe, ërei pembopo jókuae perökuavee vae; opaete peï Kɨɨyea yae vae iyɨ́vɨri vae reta, peru chupe mbota reta.

¹² Jae oekɨ mburuvicha reta jekove, kɨɨyea yae ko jae, mburuvicha guasu reta ɨvɨ pegua pe.