SALMOS 75 - Biblia Guarani Tumpa Iñee

SALMO 75 Tumpa ko mburuvicha oporojäa vae

¹ CheRu Tumpa, romee yasoropai ndeve; echa köi yae ko reï, kuimbae reta omoërakua ndembaepuere tuicha yae vae re.

² YandeYa jei: “Ara ambojeea pe, aporojäata jupi rupi.

³ Ɨvɨ okana opaete pɨpe yogüɨreko vae reta ndive yave, che ko ayoko iguapɨka reta.”

⁴ Yarakuaambae reta pe jae: “Agüɨye peyemboarakuaambae.” Jare iyoa reta pe jae: “Agüɨye peyembotuicha.”

⁵ “Agüɨye peyembotuicha pembaepuere re, agüɨye pemiari pepɨarai reve.”

⁶ Echa yemborɨ mbaetɨ ko ou kuaraɨ oëa kotɨ güi ani kuaraɨ oikea kotɨ güi ani ñuu kotɨ güi.

⁷ Echa Tumpa ko jae mburuvicha oporojäa vae, jae oporomomichi jare jae oporombotuicha.

⁸ Echa yandeYa ipo pe güɨnoi kopa iyarasɨ pegua, jare vino jayasɨ rai yae oï. Jae opɨyere yave, opaete iyoa vae reta oɨuta jese, opaetei regua omotini.

⁹ Ërei che amoërakua aveita Jacob iTumpa regua, jare atairarita chupe mbaemboete.

¹⁰ Echa jae omokañɨta iyoa vae reta imbaepuere, ërei jupi vae reta pe oñemoïruta imbaepuere.