SALMOS 74 - Biblia Guarani Tumpa IñeeSALMO 74 Yerure tëta oyeyora vaerä 1 CheRu Tumpa, ¿maera pa oremombo jekuae avei pegua? ¿Maera pa ndearasɨ yae, ndevecha reta ndekapii jokɨ katúa rupigua kotɨ? 2 Nemaendúa tëta ndembae vae re, arakae güive reiparavo ndeyeupe vae, reyora reta reyapo vaerä ndembaerä vae; nemaendúa kuae ɨvɨtɨ guasu Sión re, nde reiko pɨpe vae. 3 Eyu emae oyemboai oï vae re; ¡o mbaemboetea tovaicho reta opa omboai vae re! 4 Nderovaicho reta osapúkai oporomoamɨri pegua o mbaemboetea pe; ¡ketɨgua reta oupi ibandera öke pe, oechauka vaerä iporomoamɨri! 5 Kaa pe yepea iyapoa reta ɨvɨra opa oyasɨa rami, 6 yɨɨ pe jare martillo pe, okua reta ɨvɨra oñemopöra kavi vae re, opa vaerä omboai. 7 Oyatapɨ reta ndero mbaemboetea re; ¡omboeteä reta ndero nderee oï pɨpe vae, opa omboai reta oeya ɨvɨ rupi! 8 Oyemongeta reta opaetei vaerä omboai; ¡opaetei oapɨ reta mbaemboetea reta kuae ɨvɨ pe! 9 Mbaetɨ ma roecha romokañɨmaa oreyeupe vae; mbaetɨ ma ñeemombeúa ave, mbaetɨ vi kia orepɨte pe oikuaa kuae kërai yave regua ra oikota vae. 10 CheRu Tumpa, ¿kërai yave regua pa tovaicho reta oiporaraukata oreve? ¿Jekuae ñotai ra ndeangao reta yogüɨreko? 11 ¿Maera pa ndepo reñomi? ¿Maera pa reñeküavaiño remae? 12 Arakae güive nde Tumpa, jae ko cheruvicha guasu, ɨvɨ pe jeta reporogüɨroasayepe vae ko nde. 13 Remboyao ɨguasu ndembaepuere pe, reyoka ɨ rupigua mbaeporou reta iñäka. 14 Reyapaso mbaeporou Leviatán jee vae iñäka, jare remee ñuu rupigua mɨmba pochɨ vae reta jembiurä. 15 Reipea ɨesaɨ jare ɨ̈aka, rembondɨpa ɨ̈aka tɨpambae yepi vae. 16 Ndembae ko ara jare ndembae vi ko pɨ̈tu; nde ko reñono yasɨ jare kuaraɨ. 17 Nde ko reñono opaete ɨvɨ jembeɨ reta; nde ko reñono kuaraɨ guasu iara jare iroɨ iara. 18 Nemaendúa kuae re cheYa: Tovaicho reta iñeeasɨ katu ndekotɨ, jare yarakuaambae reta ndeangao. 19 ¡Agüɨye ore ndepɨkasu reta oremee mɨmba pochɨ vae pe! ¡Agüɨye neakañɨ jekuae avei pegua ndembae oiporara vae reta güi! 20 ¡Nemaendúa neporogüɨrökuavee päve re, echa kuae ɨvɨ tɨnɨe oï tekorai pe! 21 Agüɨye emaeño toñemomarai ipɨatɨtɨ vae reta; ¡paravete vae jare oata mbae re vae reta omeeta mbaemboete ndeve! 22 ¡Epüa cheRu Tumpa! ¡Eyeepɨ! ¡Emae kërai yarakuaambae reta ndeangao ara ñavo! 23 Agüɨye neakañɨ nderovaicho reta isapúkai güi, osapúkai ndekotɨ vae reta jekuae osapúkai ndekotɨ. |
Biblia DC Guaraní Bolivia © Bolivian Bible Society, 2001.
Bolivian Bible Society