SALMOS 73 - Biblia Guarani Tumpa Iñee

SALMO 73 Tumpa ipɨakavi regua

¹ ¡Añetete Tumpa ipɨakavi yae ko Israel kotɨ, ipɨa pe mbaetɨ güɨnoi ikavimbae vae reta kotɨ!

² Ërei che, asɨrɨrɨ seri; michi yae oata asɨrɨrɨ ete vaerä.

³ Añemoägüɨro ramo jókuae ipɨayembotuicha vae reta re, aecha ramboeve kërai yogüɨreko kavi iyoa vae reta.

⁴ Jae reta mbaetɨ etei oyemongeta mano re, oikove katu ñogüɨnoi vae jeko pegua.

⁵ Mbaetɨ mbae oiporara reta ïru kuimbae reta rami, mbaetɨ vi yogüɨrekoasɨ katu ïru kuimbae reta rami.

⁶ Jáeramo, ipɨapochɨño ombotenonde reta, oyemonde rami reta pɨarai pe.

⁷ Ikɨra yae güi jesäɨ oë potaecha, oasa ete ye güɨnoi ipɨa jemimbotaño.

⁸ Opuka pukaño oyemongeta reta ikavimbae oyapo vaerä, imiari reta ipɨarai re oyembotuicha reve.

⁹ Jei reta mbae ikavimbae ara kotɨ, jare jei reta mbae ikavimbae ɨvɨ pegua reta kotɨ.

¹⁰ Jáeramo, Tumpa güeru yeta imbae vae reta kuae pe, jare ɨ jetagüe oimeta chupe reta.

¹¹ Jare jei ipɨapochɨ vae reta: “¿Këraita pa oikuaa Tumpa? ¿Oikuaata yera Tuichagüe yae ete vae?”

¹² ¡Mase kuae iyoa vae reta! Yemboavaimbae reve güɨnoi reta jeta mbaeyekou.

¹³ ¡Chepɨa aitɨoiño ma, mbaetɨ mbaerä ikavi cheve, aitɨoño ma chepo opaete mbae ikavimbae güi!

¹⁴ Echa añenupa avei, aiporara ndeimbove ñavo.

¹⁵ Che jae yave: “Tachemiari jae reta rami”, ambotavɨta tëi ko ndembae vae reta cheTumpa.

¹⁶ Ayemongeta kuae regua aikuaa vaerä yave, yavai yae cheveguarä.

¹⁷ Ërei aike ndero mbaemboetea pegua pe yave, aikuaa këraita ko jae reta iyapɨ vae;

¹⁸ reñono reta iïchɨi yaea pe; reitɨ reta kañɨtei pe.

¹⁹ ¡Aramoete pegua opa okañɨtei reta! ¡Kɨɨye ndive opa okañɨtei reta!

²⁰ Ipaɨu güi opa vae rami, jökorai, nde cheYa, reporojäa yave, reröɨrota jókuae añete vae nunga oyekuaa vae.

²¹ Mbɨatɨtɨ jasɨ katu vae rupi aiko, chepɨa pe etei ayandu jasɨ,

²² echa mbaetɨ che chearakuaa, mbaetɨ aikuaa mbae; ¡metei mɨmba rami che nderóvai!

²³ Ërei jeseve, che aiko avei nde ndive; nde chepoko cheakatu kotɨ.

²⁴ Chereroata ndeporomboarakuaa rupi, jare cherekove iyapɨ pe chemboresiveta ikavi rupi.

²⁵ ¿Oime ra kia yé cheve ara pe? ¡Mbaetɨ! ¡Jaeño nde! Mbaetɨ ye mbae aipota kuae ɨvɨ pe.

²⁶ Chesoo jare chepɨa ikangɨ, ërei nde cheRu Tumpa, jae ko chepɨa iñepɨ̈roa jare chembaeyekou opambae.

²⁷ Echa, oyembosɨrɨ ndegüi vae reta, omanota; nde remokañɨteita opaete oyembosɨrɨ ndegüi vae reta.

²⁸ Ërei cheve ikavi yae vae ko, köiño aï ndegüi vae, cheYa Tumpa, ndereño anoi cheporoäro, amoërakua vaerä opaete nde reyapogüe.