SALMOS 72 - Biblia Guarani Tumpa IñeeSALMO 72 Yerure mburuvicha guasu re 1 CheRu Tumpa, emee mburuvicha guasu pe neporojäa jupi vae jare sɨmbi vae, 2 oporookuai vaerä tëta ndembae vae re jupi rupi, jare oiporara vae reta re isɨmbi rupi, 3 ɨvɨtɨ guasu reta jare ɨvɨtɨ raɨ reta tomee mbɨakatu jare jupi vae tëta peguarä. 4 ¡Toporookuai mburuvicha guasu jupi rupi, oiporara vae reta re! ¡Toepɨ oata mbae re vae reta imichia reta! ¡Togüɨnoi mbaepuere oporogüɨrekoasɨ katu vae reta re! 5 ¡Toipoɨu ndegüi jekuae avei rupi, kuaraɨ jare yasɨ oime ramboeve! 6 ¡Ama jare ɨsápɨi omoäkɨ ñana jare ɨvɨ rami toiko! 7 ¡Toporookuai jupi rupi, mbɨakatu toime jókuae ara rupi, mbaetɨ ma yasɨ regua! 8 ¡Togüɨnoi mbaepuere ɨguasu güive ïru ɨguasu kotɨ, jare ɨ̈aka Éufrates güive ketɨ ɨvɨ iyapɨ kotɨ! 9 ¡Jovaicho reta ñuu rupigua, toyetavatɨka itindɨasɨ jare toñemomichi jóvai! 10 ¡Mburuvicha guasu reta Tarsis pegua jare ɨguasu jembeɨ rupigua togüeru chupe mbota reta, jare mburuvicha guasu reta Sabá jare Seba pegua togüeru vi chupe mbota reta! 11 ¡Opaete mburuvicha guasu reta toyetavatɨka itindɨasɨ reve jóvai! ¡Opaete tëtaguasu reta toyeokuai chupe! 12 Echa jae oepɨta oata mbae re vae oyerure chupe vae, jare omborɨ ipɨatɨtɨ vae, mbaetɨ kia omborɨ vaerä vae. 13 Toiparareko tomae paravete jare oata mbae chupe vae re, togüɨroasayepe paravete vae reta. 14 Toepɨ mborombotavɨ jare maepɨ̈ro güi, echa jae reta jekove ikavi yae ko chupe. 15 ¡Toikove katu mburuvicha guasu! ¡Toñemee chupe Sabá pegua oro! ¡Toyerure avei jese vae! ¡Tiñee kavi avei ikotɨ vae! 16 ¡Metei poagua oñeotɨ trigo ɨvɨ pe, jare ɨvɨtɨ guasu reta rupi vae! ¡Ia jeta yaeta Líbano pe ɨvɨra jeta rami! ¡Tëta guasu pegua reta tijeta, ñana jeta rami! 17 ¡Mburuvicha guasu jee toiko avei! ¡Tijërakua avei jee toiko, kuaraɨ oime ramboeve! ¡Jese toyekou opaete tëtaguasu reta! ¡Jese timiari kavi opaete tëtaguasu reta! 18 Toyemboete cheYa Tumpa, Israel iTumpa, jaeño ko mbaembae tuichagüe iyapoa. 19 Toyemboete jekuae avei pegua jee imboetea yae vae. ¡Opaete ɨvɨ titɨnɨe iyemboetea! ¡Amén! ¡Amén! 20 Kuae pe iyapɨ David, Isaí taɨ iyerure reta. |
Biblia DC Guaraní Bolivia © Bolivian Bible Society, 2001.
Bolivian Bible Society