SALMOS 71 - Biblia Guarani Tumpa Iñee

SALMO 71 Ndechi iyerure

¹ CheYa Tumpa, nderé ko añepɨ̈ro; ¡agüɨye etei tañemomaraiuka!

² ¡Chemborɨ jare chereepɨ, echa nde jupi vae ko! Ndeapɨsa emboɨke chekotɨ jare chereroasayepe.

³ Nde eiko avei cheve metei ita guasu rami cheñepɨ̈rokarä, ¡nde reñererökuavee chereroasayepe vaerä! ¡Nde ko jae ita guasu rami cheve vae, jare cheñepɨ̈roa!

⁴ CheRu Tumpa, chereepɨ iyoa vae reta ipo güi, jókuae oporoyuka jare ipɨarai vae reta güi,

⁵ echa nde, cheYa Tumpa, jae ko chetaɨrusu güive cheporoäro kavi nderé vae.

⁶ Chesɨ jɨe peve nderé aikove; ¡nde ko remee aa vaerä chesɨ jɨe güi! ¡Ndeve ameeta mbaemboete jekuae avei!

⁷ Mɨakañɨrä aiko jeta vae reta pe, ërei nde ko jae cheñepɨ̈roa jëguambae.

⁸ Opaete ara cheñee rupi, toime avei mbaemboete ndeyemboetea regua.

⁹ Agüɨye chereröɨro chendechi ma yave; agüɨye chereeya mbaetɨ ma chepɨ̈rata yave.

¹⁰ Echa cherovaicho reta cheré aveiño imiari, chepïaro vae reta oyomboatɨ oyemongeta cheyuka vaerä.

¹¹ Jei reta: “¡Peaɨkuemoña jare peipɨɨ, echa Tumpa oeya ma, mbaetɨ ma kia oepɨ vaerä!”

¹² CheRu Tumpa, agüɨye chereeya; ¡eyu jarembae chemborɨ!

¹³ ¡Toñemomaraiuka, tomano oipota cheyuka vae reta! ¡Toñemomarai jare tipɨajopa, oipota ikavimbae cheve vae reta!

¹⁴ Ërei che jekuae avei roärota, jare jeiete romboeteta.

¹⁵ Amoërakuata ara ñavo reyapogüe jupi ko vae, jare ara ñavo reporogüɨroasayepe vae; ¡yepe tëi mbaetɨ aikuaa mbovɨ etei ko!

¹⁶ Aipapata, nde cheYa Tumpa tuichagüe mbaembae reyapogüe; ¡amoërakuata ndeño ko jupi vae!

¹⁷ CheRu Tumpa, nde chemboe ko chetaɨrusu güive, jare añave rupi jekuae amombeu mbae tuichagüe reyapo vae.

¹⁸ CheRu Tumpa, agüɨye chereeya, yepe tëi chendechi jare cheatï, amoërakua regua ndembaepuere kuimbae reta iñemuña pe, jare taɨkue rupi yogüɨrekota vae reta pe.

¹⁹ CheRu Tumpa, ndembaejupi oupitɨ ara; nde reyapo mbae tuicha yae vae reta. ¡Mbaetɨ yé kia nde rami!

²⁰ Nde reechauka cheve jeta mbɨatɨtɨ jare ikavimbae reve, remee yeta cheve tekove; chemopüa pɨau yeta ɨvɨkua guasu güi.

²¹ Remoïru yeta chembaepuere, jare chembopɨakatu yeta ko.

²² Che romboeteta ngitara ndive, cheRu Tumpa, atairarita ndeve, nde añete ko vae arpa ndive, cheRu Iyoambae Israel pegua.

²³ Ayerovia yaeta atairari ndeve yave, che, nde chereroasayepe vae.

²⁴ Chemiarita vi ara ñavo ndembaejupi re; echa oñemomaraiuka jare ipɨajopa, jókuae oipota ikavimbae cheve vae reta.