SALMOS 69 - Biblia Guarani Tumpa Iñee

SALMO 69 Sapúkai mbɨatɨtɨ pegua

¹ Chereroasayepe, cheRu Tumpa, echa ɨ cheyukata ma.

² Ɨvɨasuru yaea pe aï, mbaetɨ ketɨ apɨ̈ro vaerä; aja ɨrugua tɨpɨ yaea pe, chereraja ɨ ipɨ̈rata yae vae.

³ Chekangɨ ma aporoenɨi, cheaseo jäve ma, cheresa ikangɨ ma aäro cheRu Tumpa.

⁴ Cheäka re chea oï vae güi jeta yae cherekombae reve chemotareɨ vae reta; jëia yae oyeapo cherovaicho reta, cherekombae reve chemokañɨtei vae reta, oipota omboepɨuka reta cheve, mbaetɨ añomi vae.

⁵ CheRu Tumpa, nde reikuaa che chearakuaambae vae, jare cheyoa reta mbaetɨ ko oñemi ndegüi.

⁶ CheYa Tumpa Imbaepuere yae ete vae, agüɨye timara chereko pegua, nderé oyeko vae reta, agüɨye toyembojopa chereko pegua, ndereeka vae reta, cheRu, Israel iTumpa.

⁷ Echa roaɨu ramo aiporara ñemotareɨ; aiporara ñemomarai.

⁸ ¡Ketɨguaecha aiko cherëtara reta pe, jare chesɨ imembɨ reta mbaetɨ chekuaa rami!

⁹ Echa ndero re cherägüɨro yae vae re aiporara; ndeangao vae reta cheangao vi.

¹⁰ Ayaeo jare ayekuaku tembíu güi yave, cheyóyai yóyai reta.

¹¹ Ayemonde temimonde mbɨatɨtɨ pegua yave, cheapo reta iñeerä,

¹² imiari ari reta chekotɨño tëta guasu öke pe oguapɨ vae reta, jare okau vae reta itairari rupi cheangao.

¹³ CheRu Tumpa, añave ayerure ndeve ndepɨakavi re; cheRu Tumpa, ndeporoparareko tuicha yae vae re, ndeporogüɨroasayepe añete vae re, ¡eendu cheve!

¹⁴ ¡Cherenoe tuyuapo güi, agüɨye opa takañɨ pɨpe! ¡Chereepɨ chemotareɨ vae reta güi, jare ɨ tɨpɨ yae vae güi!

¹⁵ ¡Agüɨye tachereraja ɨ ipɨ̈rata vae! ¡Agüɨye tachereitɨ ɨ oyepɨu vae pe ave, jare chemondo ɨ́vɨkotɨ!

¹⁶ Eendu cheYa, echa ikavi yae ko ndeporoparareko; emae cheré ndeporoaɨu tuicha vae rupi.

¹⁷ Agüɨye eyerova che nderembiokuai güi, echa chepɨatɨtɨ aï, jarembae voi eendu cheve.

¹⁸ Eya katu cheré, chereepɨ; chereroasayepe cherovaicho reta güi.

¹⁹ Nde reikuaa ko kërai chekura reta vae, chembopɨakavimbae vae jare chemomarai reta vae; nde reikuaa ko opaete cherovaicho reta.

²⁰ Cheyóyai yóyai yae reta vae chembopɨtu yae jare chembopɨatɨtɨ yae. Aäro kia cheparareko vaerä, ërei mbaetɨ; jare oporombopɨakatu vae ave mbaetɨ aväe.

²¹ Cherembiurä oñono reta mbae iroasɨ vae, jare cheɨuve yave omee reta jau vinagre.

²² Iarete pegua tembíu kavi reta toï chupe reta ñuai rami, ikavi vaerä tëi vae, yemboavairä.

²³ Topɨta reta jesambae rami, agüɨye vaerä oecha reta; torɨrɨi reta ipɨtu yave güi.

²⁴ Eitɨ ndearasɨ jese reta, ndearasɨ yae vae toupitɨ reta.

²⁵ Jo kavi topa toyemboai; iküaraɨa guakapi pegua topɨta ipombae.

²⁶ Echa oiporarauka reta, nde reiporarauka chupe vae pe; jare oyóyai yóyai reta nde rembopere vae.

²⁷ Jeko kavimbae pe emboekovia ikavimbae, jare agüɨye etei neɨ̈ro chupe.

²⁸ Opa vi emboai oikove vae reta jee oyekuatía ñogüɨnoia güi, jare agüɨye toyekuatía jupi vae reta jee ipɨte pe.

²⁹ Ërei che, chepɨatɨtɨ jare cheparavete vae, chemopüa jare chereroasayepe cheRu Tumpa.

³⁰ Amboeteta cheTumpa jee tairari pe, ambotuichata mbaemboete pe.

³¹ YandeYa ombopɨakatu yaeta, toro oyeyuka oñemee chupe vae güi, ani toro taɨrusu vae güɨnoi jäti jare ipɨ̈sa jakambɨ vae güi.

³² Jasɨ katu rupi yogüɨreko vae reta oechata jare oyeroviata. Peeka Tumpa, jare pepɨa oyerovia katuta.

³³ Echa yandeYa oyeapɨsaka mbae re oata vae reta re, jare mbaetɨ güɨröɨro imbae vae reta tembipɨɨrä ñogüɨnoi vae.

³⁴ ¡Pemboete yandeYa, opaete oikove vae reta; ara, ɨvɨ, ɨguasu reta pegua reta!

³⁵ Echa Tumpa oepɨta Sión, jare omopüa pɨau yeta tëta guasu reta Judá pegua; yogüɨrekota pɨpe vae jare imbaerä oikota.

³⁶ Jembiokuai reta iñemuña reta imbaerä vi ko tëta guasu. ¡Tumpa jee oaɨu vae reta yogüɨrekota pɨpe!