SALMOS 68 - Biblia Guarani Tumpa IñeeSALMO 68 Tumpa oyekuaa Sinaí pe vae regua 1 Epüa cheRu Tumpa, topa toñemoai moai nderovaicho reta, totekuarai ndegüi nemotareɨ vae reta. 2 Tätati okañɨ rami okañɨ retata, iraitɨ tɨkui tata pe rami. ¡Jökoraita okañɨtei iyoa vae reta nderóvai güi! 3 Ërei jupi rupi yogüɨreko vae oyeroviata, ovɨa katu yaeta nderóvai. ¡Güɨropota oyerovia güi! 4 Petairari Tumpa pe, petairari Salmo pe jae jee re. Pembotuicha ɨvate ara rupi oguata vae. ¡Peyerovia yandeYa jee re! ¡Peyerovia jae jóvai! 5 Tumpa, oiko jo oñeñono tee vae pe vae, jae ko tɨ̈reɨ reta tu jare imemano vae reta jepɨa vae. 6 Tumpa omee jëtara, mbaetɨ kia chupe vae pe, oyora tembipɨɨ reta jare omee yogüɨreko kavi vaerä; ërei ipɨapochɨ vae reta yogüɨreko ɨvɨ ikavimbaea pe. 7 CheRu Tumpa, reo yave tëta ndembae vae reta jenonde, reguata yave ñuu rupi, 8 ɨvɨ okana, okɨ vi nderenonde, ɨvɨtɨ Sinaí okana nde Israel iTumpa jóvai. 9 CheRu Tumpa, nde ko rembou jeta okɨ vaerä, ndeɨvɨ otini yae vae rembogüera katu ye. 10 Ndembae vae reta oñemoëta joko pe, cheRu Tumpa, ndepɨakavi rupi remee mbae paravete vae reta pe. 11 YandeYa omee ñee; jeta kuña omoërakua körai: 12 “¡Otekuarai mburuvicha guasu reta jare isundaro reta!” Kuña reta o rupi opɨtagüe omboyao oyoupe mbae oñepɨ̈rogüe, 13 ërei pe reta opa peñemi. ¡Pɨkasu ipepo korepoti pe oñeovagüe rami! ¡Pɨkasu jaa oñeova oro pe rami! 14 Imbaepuere yae ete vae opa omoai moai joko pegua mburuvicha guasu reta yave, iroɨ jaɨvi oa ɨvɨtɨ guasu Salmón re ramita. 15 ¡Tumpa iɨvɨtɨ guasu jae ko Basán, ɨvate yae yé ɨvɨtɨ guasu Basán! 16 Pe, ɨvɨtɨ guasu ɨvate yae vae reta, ¿maera pa pemotareɨ pemae jókuae ɨvɨtɨ Tumpa oiparavo oiko vaerä pɨpe vae re? ¡YandeYa oikota ko pɨpe jekuae avei pegua! 17 Tumpa ikäretou oyepapa vaerä jeta yae ete ko; cheYa ou Sinaí güi itupao pe. 18 Reyeupi ɨvate, reraja reve tembipɨɨ reta, remee mbota reta kuimbae reta pe, ipɨapochɨ vae reta pe ave, reiko vaerä jae reta ipɨte pe, cheYa Tumpa. 19 Toyemboeteuka cheYa; ara ñavo jeta rupi oremboyekou vae, Tumpa orereroasayepe vae. 20 Tumpa, jae ko oreTumpa oporogüɨroasayepe vae, jae ko yandeYa oporoyora mano güi vae. 21 Añetete, Tumpa ombopereta jovaicho reta iñäka, mbaeyoa rupi jekuae aveiño oiko vae iñäka. 22 YandeYa jei: “Basán güi rogüeru yeta; rogüeru yeta ɨguasu iyɨvɨte güi, 23 echa ndepɨ jare ndeyaɨmba reta ikü moropɨ̈tata nderovaicho reta jugüɨgüe pe.” 24 CheRu Tumpa, cheTumpa jare cheRuvicha guasu, ndero mbaemboetea pe, oyereroata oyeapo mbaemboete ndeve. 25 Otairari vae reta yogüɨraja tenonde, tembiporu tairari pegua ombopu vae reta taɨkue, jare mbɨte pe yogüɨraja kuñatai taɨrusu vae reta ombopu reve angúa raɨ. 26 ¡Pemboete Tumpa peyemboatɨa pe! ¡Pemboete, pe opaete Israel iñemuña reta! 27 Joko pe oï taɨrusu vae Benjamín, jese reta oporookuai vae, jeta tenondegua reta Judá pegua, Zabulón pegua jare Neftalí pegua ndive. 28 CheRu Tumpa, eechauka ndembaepuere; ¡emoañete reyapo orevegüarä vae! 29 Ndetupao Jerusalén pe oï vae pe, mburuvicha guasu reta mbota güeru ndevea pe. 30 Emokïrii, tembiporu ñeraro pegua ndive oyemboatɨ vae reta, jókuae toro jare toro taɨrusu vae reta jetagüe rami vae, yogüɨreko regua rerea re opaete imbaembae korepoti pegua ndive, opa emoai moai iñorarose vae reta. 31 Yogüeruta mburuvicha reta Egipto pegua, Etiopía jarembae voita ipo omopüa Tumpa pe. 32 Mborookuaía reta ɨvɨ pegua, ¡petairari Tumpa pe, petairari yandeYa pe! 33 ¡Ɨvate ara rupi oguata vae, jae ko oiko ñomai vae! Mase, ko jae oendukata iñee tätagüe vae. 34 Pemae jese, kërai Tumpa imbaepuere yae vae ko, iyemboetea oñemoai Israel re, jare imbaepuere oupitɨ ara. 35 CheRu Tumpa, kɨɨyea ko nde, ndero mbaemboetea pe; nde Israel iTumpa, nde ko remee mɨ̈rata jare tekove katu ndembae vae reta pe. ¡Toyemboete Tumpa! |
Biblia DC Guaraní Bolivia © Bolivian Bible Society, 2001.
Bolivian Bible Society