SALMOS 66 - Biblia Guarani Tumpa Iñee

SALMO 66 Mbaemboete Tumpa oyapogüe reta re

¹ Petairari Tumpa pe peyerovia reve, opaete ɨvɨ pegua reta.

² Petairari jee imboetea yae re, pemboete petairari pe iyemboetea.

³ Pere Tumpa pe: “Oporomopɨakañɨ yae nderembiapo reta. Ndembaepuere tuicha yae vae rupi nderovaicho reta yogüɨrekota nde rerea re;

⁴ opaete ɨvɨ pegua reta ndemboeteta jare otairari retata nderee re.”

⁵ Peyu pemae Tumpa jembiapo reta re, mɨakañɨ reta tuichagüe oyapo kuimbae reta peguarä:

⁶ Omboyao ɨguasu jare omotini, ñaneñemuñagüe reta oasa ipɨ re ɨ̈aka; jáeramo, ¡yayerovia jese!

⁷ Jae oporookuai jekuae avei pegua imbaepuere pe; omae oï tëtaguasu reta re, ipɨapochɨ vae reta agüɨye vaerä oñemopüa ikotɨ.

⁸ ¡Tëtaguasu reta, pemboete ñaneTumpa! ¡Peenduka petairari mbaemboete pegua!

⁹ Echa jae ko omee yaikove vaerä; mbaetɨ omaeño yagüɨapi.

¹⁰ OreRu Tumpa, nde ko orejäa, ¡oretɨo kavi, korepoti oyetɨo kaviasɨ rami!

¹¹ Orereitɨuka ñuai pe; reñono oreré voɨta ipoɨ yae vae.

¹² Remaeño oipotagüe kuimbae reta opɨ̈ro oreaseo re; roasa tata rupi jare ɨ rupi rami, ërei taɨkue ete rupi remee roikove.

¹³ Aiketa ndero pe amee ndeve mɨmba oyeyukagüe opaetei oyeapɨ vae; ameeta ndeve añererökuavee vae,

¹⁴ chepɨatɨtɨ aï yave, arökuavee ndeve vae.

¹⁵ Ameeta ndeve mɨmba oyemongɨragüe opaetei oyeapɨ vaerä vae vecha kuimbae; ameeta ndeve mɨmba oyeyukagüe toro jare kavara kuimbae.

¹⁶ ¡Peyu, opaete Tumpa güi peipoɨu vae reta! ¡Peyeapɨsaka, amombeuta peve mbae oyapo cheveguarä vae!

¹⁷ Che aenɨi, jare amboete.

¹⁸ Chepɨa pe anoi yemongeta ikavimbae vae yave, mbaetɨta tëi ko Tumpa oyeapɨsaka cheré.

¹⁹ ¡Ërei jae oyeapɨsaka cheré, oendu cheyerure amoñera reve vae!

²⁰ ¡Toyemboeteuka Tumpa, mbaetɨ cheyerure güɨröɨro chegüi vae, mbaetɨ iporoparareko ombosɨrɨ chegüi vae!