SALMOS 65 - Biblia Guarani Tumpa Iñee

SALMO 65 Jupi ko Tumpa pe oñemee vaerä mbaemboete

¹ CheRu Tumpa, ¡ndeve ko mbaemboete oñemee Sión pe! ¡Ndeve ko oñemeeta oñererökuaveegüe,

² echa nde reendu yerure! Ndekotɨ outa opaete vae.

³ Mbaeyoa güɨnoi mbaepuere oreré, ërei nde neɨ̈ro orepɨapochɨ reta re oreve.

⁴ Oyerovia yae ko jókuae kuimbae reiparavo jare reru ndekotɨ vae, oiko vaerä nderoka pegua cuarto reta pe. ¡Oremoangapɨɨ ndero pegua mbae ikavi yae vae re, ndero oñeñono tee vae pe!

⁵ Mbae tuichagüe rupi remboyevɨta oreve jupi vae, cheRu Tumpa orereroasayepe vae, opaete ɨvɨ pegua reta oyerovia jese vae, mombɨrɨ ɨguasu jembeɨ rupi ñogüɨnoi vae reta vi.

⁶ Nde ko ɨvɨtɨ guasu reta reñono jenda rupi ndembaepuere pe,

⁷ remokïrii ɨguasu reta iyɨaparúa, jare tëtaguasu reta jekorai.

⁸ Mombɨrɨ rupi yogüɨreko vae reta ave okɨɨye mɨakañɨ reta reyapo vae güi; nde remee oime vaerä yerovia katu opaete ɨvɨ rupi.

⁹ Nde reyangareko ɨvɨ re, remongɨ jese jare jeta mbaagüɨye; ndeɨ jeta ombokuakuaa temitɨ, nderemimbota rupi.

¹⁰ Remoäkɨ kavi ɨvɨ oyearagüe, jare rembochuumbi ɨvɨkɨ̈ta reta, rembosɨmbi ama pe, ndeporerekua temitɨ reta re.

¹¹ Nde remotɨnɨe año opaete mbaembae pe, nde rembou amapɨtu rupi jeta mbaembae;

¹² ñuu rupigua kapii reta jokɨ katu, ɨvɨtɨ reta jovɨ kavi oyekuaa.

¹³ Ɨvɨpe kavi reta tɨnɨe mɨmba, jare ɨvɨtɨ päu ipe kavi vae reta rupi jeta mbaagüɨye; ¡opaete jäsémbai jare otairari oyerovia güi!