SALMOS 64 - Biblia Guarani Tumpa Iñee

SALMO 64 Yerure ñeovatu pegua tovaicho güi

¹ CheRu Tumpa, eendu mbae chemoäse vae; eñovatu cherekove tovaicho reta yavaetegüe güi.

² Cheomi jeko kavimbae reta iyemongeta vɨari güi; chereepɨ jeko kavimbae reta oyomboemboe chekotɨ vae güi.

³ Oimbee reta ikü kɨsepuku rami, ojäa reta uvɨ rami ñee ikavimbae.

⁴ Oñemía güi oñɨvo reta jekombae; oesapɨa oñɨvo reta okɨɨyembae reve.

⁵ Ipɨayemboete reta jupimbae oyapo vae rupi; oyemongeta reta ñuai oñomi oñono vaerä, jare jei reta: “¿Kia pa oechata?”

⁶ Oyemongeta reta mbaetɨta kia oikuaa chugüi reta ikavimbae oyapo vae. Ërei Tumpa ipuere oikuaa kuimbae iyemongeta vae, jae oikuaa kavita.

⁷ Tumpa ko oñɨvo retata juvɨ pe, iparanoe oñɨvo retata;

⁸ iñee aeño oyeapata ikotɨ reta, opaete oecha vae oyóyai retata.

⁹ Jayave opaete kuimbae reta oipoɨuta, oikuaa retata Tumpa oyapogüe, jare omoërakua retata.

¹⁰ Kuimbae jupi rupi oiko vae oyerovia katuta yandeYa re jare oyekota jese; jare opaete ipɨa jupi reve yogüɨreko vae oyerovia yaeta.