SALMOS 63 - Biblia Guarani Tumpa Iñee

SALMO 63 Tumpa, kuimbae omboyerovia vae

¹ ¡CheRu Tumpa, nde ko jae cheTumpa! Ndei köe mbove roekata, echa cheɨuve yae rami nderé, cherete etei ndereeka, ɨvɨ otini jare ɨ mbaetɨa pe rami.

² ¡Chekɨ̈reɨ roecha ndero mbaemboetea pe, jare chepɨakañɨ ndembaepuere re jare ndeyemboetea re,

³ echa ikavi yae ko ndeporoparareko tekove güi! Romboeteta tairari ndive.

⁴ Jökorai romboeteta opaete cherekove rupi, nderee re aupita chepo ayerure.

⁵ Cheangapɨɨ kavita, maekägüe iñaputuu re jare soo ikɨra kavi vae jou vae yangapɨɨ kavi rami, romboeteta yerovia katu reve.

⁶ Pɨ̈tu rupi cherupa pe chemaendúa nderé; pɨare mbɨte rupi ayemongeta nderé.

⁷ Echa nde ko jae chemborɨ vae. ¡Ndepepo igüɨ pe ayerovia katuta!

⁸ Cherekove oyaasɨ oï nderé; ndepo ndeakatu cheoko.

⁹ Ërei oipota tëi cheyuka vae reta, oata ɨvɨgüɨ kotɨ, omanogüe reta ñogüɨnoia pe;

¹⁰ ¡kɨsepuku pe omano retata, toiko reta aguarayaɨmba jembiurä!

¹¹ Ërei che mburuvicha guasu ayeroviata nderé; oyemboeteta opaete jei nderee re vae, echa iyapu imiari vae reta, iyuru oyeokendata.