SALMOS 61 - Biblia Guarani Tumpa Iñee

SALMO 61 Yayeko Tumpa iporomborɨ re vae

¹ CheRu Tumpa, eendu chepɨatɨtɨ reve ayerure vae. ¡Eyeapɨsaka cheyerure re!

² Matɨ ɨvɨ iyapɨ kotɨ güi ayerure ndeve chepɨa jëogüe yave. Chereraja ɨ̈vavira ɨvate yae chegüi vae re,

³ echa nde jae ko cheñepɨ̈roa. ¡Nde ko jae maeka ɨvate yae tovaicho reta jóvai vae!

⁴ Che taiko ndero guakapi pegua pe jekuae avei pegua, tañemi kavi taiko ndepepo igüɨ pe.

⁵ Echa nde, cheRu Tumpa, reendu cheñererökuavee, remee chembaerä ɨvɨ nderee omboete vae reta imbae.

⁶ Che mburuvicha guasu pe embopuku cherekove, taiko ɨma año, ɨma yeyé,

⁷ taiko mburuvicharä jekuae avei pegua ndeporerekua rupi, emokätɨro mbɨakavi jare añete vae cheövatu vaerä.

⁸ Jökorai atairarita nderee re jekuae avei pegua, ambopo reve cheñererökuavee reta ara ñavo.