SALMOS 60 - Biblia Guarani Tumpa Iñee

SALMO 60 Yerure Tumpa iporomborɨ re

¹ CheRu Tumpa, oremombo ko, reiporarauka oreve; ndearasɨ, ërei ¡eyerova ye orekotɨ!

² Ɨvɨ remokana jare oyeka; ¡eñono kavi, echa opa osururu oï!

³ Reechauka ndembae vae reta pe mbae yavai yae vae, remee roɨu vino oporombosavaɨpo vae re rami.

⁴ Ndegüi oipoɨu vae reta pe remopüa bandera, ojoyepe vaerä uvɨ güi.

⁵ Oasayepe vaerä nderembiaɨu reta, ¡eroasayepe ndembaepuere pe! ¡Eendu cheve!

⁶ Tumpa jei jo mbaemboetea pe: “¡Che ayerovia yaeta amboyao Siquem, jare ajäata ɨvɨtɨ päu ipe kavi vae Sucot!

⁷ Chembae ko Galaad jare Manasés; Efraín jae ko äka-ɨru jiero pegua rami cheäka re; Judá jae ko chepo pegua ɨvɨra mborookuai pegua rami;

⁸ Moab, jae ko cheyepoeka rɨru rami; Edom re amombota chepɨapaa. ¡Aporomoamɨri güi asapukaita filisteo reta re!”

⁹ ¿Kia pa chererajata tëta guasu oñekëse kavi vae pe? ¿Kia pa chererajata Edom pe?

¹⁰ Echa nde, cheRu Tumpa, oremombo, ¡mbaetɨ ma reo oresundaro reta ndive!

¹¹ Oremborɨ orerovaicho reta re, echa kuimbae iporomborɨ mbaeä etei ko.

¹² Ndeporomborɨ rupi orepuere royapo mbae tuichagüe, ¡nde repɨ̈rota orerovaicho reta re!