SALMOS 59 - Biblia Guarani Tumpa Iñee

SALMO 59 YandeYa jae ko yandeyeopiaka

¹ CheRu Tumpa, chereepɨ cherovaicho reta güi; chereroasayepe oñemopüa chekotɨ vae reta güi.

² Chereepɨ jeko kavimbae reta güi, chereroasayepe oporoyuka vae reta güi.

³ Echa, ko chepïaro reta cheyuka vaerä, oyomboatɨ reta chekotɨ imbaepuere vae reta. CheYa Tumpa, mbaetɨ cheñee-rei, ani ayapo mbaeyoa jeko pegua.

⁴ Cherekombae reve iyandeko oñemopüa reta cheré. ¡Epa! ¡Eyu kuae aïa pe emae cheré!

⁵ Nde, cheYa, Tumpa Imbaepuere yae ete vae, Israel iTumpa, epa reiporarauka vaerä opaete tëtaguasu reta pe; agüɨye eiparareko oyembopɨapochɨ ikavimbae rupi vae reta.

⁶ Yogüeru kaaru yave, oñaro reta yaɨmba rami, jare oyere reta tëta guasu re.

⁷ Mase, jei reta mbae ikavimbae, jembe re güɨnoi rami kɨsepuku, jei reta: “¡Mbaetɨ etei kia yandereendu vae!”

⁸ Ërei ngatu nde cheYa, repukata jese reta; nde reyóyai yoyaita opaete tëtaguasu reta.

⁹ Tovaicho reta imbaepuere yae jeko pegua ndereño ayekota, echa nde Tumpa jae ko chereepɨ vae.

¹⁰ Tumpa cheparareko vae ojota cherenonde, Tumpa omeeta aecha vaerä cherovaicho reta ikañɨtei.

¹¹ Agüɨye opaete voi eyuka, cherëtaɨgua reta oecha vaerä; ndembaepuere pe opa emoai moai, jare emomichi reta. ¡CheYa Tumpa, oreyeopiaka!

¹² Iyoa reta opaete mbae jei vae jeko pegua, iyembotuicha pe aeño tembipɨɨrä toyeapo, jare iyepopeyu apu rupi vae pe.

¹³ ¡Emokañɨtei arasɨ ndive! ¡Emokañɨtei agüɨye vaerä ma yogüɨreko! ¡Opaete vae toikuaa Tumpa jae ko Jacob iñemuña reta juvicha guasu, opaete ɨvɨ iyapɨ rupi ave!

¹⁴ Yogüeru kaaru yave jare oñaro reta yaɨmba rami, jare oyere reta tëta guasu re.

¹⁵ Oguata reteiño oeka reta mbae jou vaerä, mbaetɨ jɨ̈vɨata yave, iköeiño oyaeo reta.

¹⁶ Ërei che atairarita ndembaepuere regua, ambaemboeteta ndeimbove yave ndeporoparareko regua. Echa nde jae ko cheyeepɨka jare cheñepɨ̈roa chepɨatɨtɨ aï yave.

¹⁷ Atairarita ndeve, echa nde cheRu Tumpa jae ko cheñepɨ̈roa, ¡Tumpa cheraɨu vae!