SALMOS 58 - Biblia Guarani Tumpa Iñee

SALMO 58 Yerure tovaicho reta kotɨ

¹ Imbaepuere vae reta, ¿añetete ra pere jupi vae? Kuimbae reta, ¿peporojäa ra jupi rupi?

² ¡Mbaetɨ! Pepɨa pe peyemongeta peyapo vaerä ikavimbae; jeieteño peyapo ikavimbae ɨvɨ pe.

³ Mbaeyoa iyapoa reta, ichɨ jɨe güive voi ma jökorai ou; apu imiari vae reta oa ramo güive voi jökorai.

⁴ Güɨnoi reta mbayachi mboi imbayachi rami; oyapete reta iyapɨsa mboi rami,

⁵ agüɨye vaerä oendu kuimbae opɨrae vae ipɨrae, yepe tëi ipoki yae jókuae opɨrae vae.

⁶ CheRu Tumpa, ¡emopë jäi chugüi reta! CheYa Tumpa, ¡emopë yaguapope raɨ reta jäimbuku rami!

⁷ Tokañɨ reta ɨ osɨrɨ vae rami; juvɨ ojäa yave, topa topë topë;

⁸ toasa reta yatɨta okañɨ rami, jare ¡michia omano oa vae, mbaetɨ tembipe oecha vae rami!

⁹ Tókai reta yuu jendɨ rai vae rami, jökorai jekove reve jare iyarasɨ reve topa ɨvɨtuai togüɨroveve reta.

¹⁰ Oyeroviata jupi vae oecha yave kia oyepɨ chupe; ¡ipɨ oyoeta jupimbae reta jugüɨgüe pe!

¹¹ Jayave jeita: ¡Añetete oime yepe mbae ikavi yae vae, jupi rupi oiko vae peguarä! ¡Añetete oime yepe Tumpa ɨvɨ pegua reta ojäa vae!