SALMOS 57 - Biblia Guarani Tumpa Iñee

SALMO 57 Yerure yereroasayepe pegua oporoaɨkuemoña vae reta güi

¹ CheRu Tumpa, cheparareko, cheparareko, echa nderé ayeko. Ndepepo igüɨ pe añepɨ̈rota oasa regua mbaesusere reta.

² Tayerure ndeve, nde Tumpa Tuichagüe yae vae pe, nde reyapo ikavi vae cheve vae,

³ rembouta ndeporoaɨu ara güi jare chereroasayepeta, iyarasɨ reve cheraɨkuemoña vae reta güi.

⁴ Cherekove oï yaguapope reta ipɨte pe rami, ayepɨso aï oporou vae reta ipɨte pe; jäi reta mii rami jare uvɨ rami, ikü, kɨsepuku oyeimbeegüe rami.

⁵ CheRu Tumpa, nde ko ɨvate yé ara güi vae. ¡Ndeyemboetea tɨnɨe oï opaete ɨvɨ!

⁶ Ñuai oñono reta cheraperä pe, chembopɨatɨtɨ yae reta; ɨvɨkua oyoo reta cheraperä pe, ërei jae reta yeño opa oa pɨpe.

⁷ CheRu Tumpa, chepɨa oïndaivi oï; aïndaivi aï, atairari vaerä ndeve tairari.

⁸ Tapüa ndeimboveasɨ; arpa jare ngitara, epa.

⁹ CheYa Tumpa, toromboete tairari pe opaete vae reta ipɨte pe, tatairari ndeve tëtaguasu reta ipɨte pe.

¹⁰ Echa ndeporoparareko oupitɨ ara, neñee rembopo avei vae ɨvate amapɨtu rami.

¹¹ CheRu Tumpa, nde ko ɨvate yae ara güi vae. ¡Ndeyemboetea tɨnɨe oï opaete ɨvɨ!