SALMOS 56 - Biblia Guarani Tumpa Iñee

SALMO 56 Yerure Tumpa re yayeko regua

¹ Cheparareko cheRu Tumpa, echa cheyukata vae; cheaporai yae ara ñavo.

² Opaete ara cherovaicho reta chepïaro; echa jeta yae ko oñeraro ipɨapochɨ reve chekotɨ vae.

³ Akɨɨye yae yave, ayeko ndereño.

⁴ Ayeko nderé jare amboete neñee; ayeko nderé, ngaraa akɨɨye. ¿Kia pa ipuereta oyapo cheve mbae?

⁵ Ara ñavo oipoepɨ reta teko chekotɨ; oyemongeta reta chekotɨ ikavimbaeño.

⁶ Oyemboatɨ reta, oñemi reta, chepïaro avei reta, oeka reta kërai cheyuka vaerä.

⁷ CheRu Tumpa, ejäa reta ikavimbae oyapogüe oï rupi, javoi emokañɨtei ndearasɨ rupi opaete vae reta.

⁸ Nde reikuaa kërai ko che atekuarai aiko vae; nde remboɨru cheresaɨ reta ndeɨakua pe. ¿Oimeä yera oyekuatía oï nderembikuatía pe?

⁹ Cherovaicho reta opata oyerova ye jaɨkue kotɨ, jókuae ara ayerure ndeve yave; aikuaa katu oime ko reï chemborɨ vaerä.

¹⁰ Ayeko nderé jare amboete neñee cheTumpa, ayeko nderé cheYa jare amboete neñee.

¹¹ Ayeko nderé, ngaraa akɨɨye. ¿Mbae pa ipuereta oyapo cheve kuimbae?

¹² CheRu Tumpa, cheré oï añererökuavee ndeve vae, ameeta ndeve mbaemboete.

¹³ Echa chereroasayepe mano güi, jare agüɨapi vaerägüe güi, aguata vaerä nderóvai, oikove vae reta ipɨte pe.