SALMOS 55 - Biblia Guarani Tumpa Iñee

SALMO 55 Oñemuñauka tovaicho reta pe vae iyerure

¹ CheRu Tumpa, eendu cheyerure, agüɨye emaeiño cheyerure re.

^2-3 Eïndaivi eï jare emboyevɨ cheve; chepɨatɨtɨ ayerure. Chepɨakaviä cherovaicho reta jeko pegua, jupimbae vae reta. Echa chembopɨatɨtɨ yae reta, oporepeña reta cheré iyarasɨ yae reve.

⁴ Chepɨa onduku cheɨvɨte pe; jare kɨɨye mano pegua ou cheré.

⁵ Akɨɨye yae jare arɨrɨi aï, ¡kɨɨye yavaetegüe cheöva!

⁶ Jare jae: “Mbae mona chepepo, aveve vaerä pɨkasu rami; aveveta jare aputuuta tëi ko.

⁷ Atekuaraita tëi mombɨrɨ; apɨtata aiko ñuu pe.

⁸ Jarembae voi atekuaraita añemi vaerä, ama ɨvɨtuai reve yavaetegüe güi.”

⁹ CheYa, emboai reta, embojopa iñee reta, echa jaeño aecha tekorai jare ñomotareɨ tëtaguasu pe.

¹⁰ Ara pe jare pɨ̈tu yave oyere tëta guasu ikësea iárambo rupi, ikavimbae jare omaepɨ̈ro vae oime pɨpe.

¹¹ Ikavimbae oime pɨpe, mbaembotavɨ mbaetɨ osɨrɨ ikaye reta güi.

¹² Mbaetɨ chemomarai metei tovaicho jókuae aropɨata tëi ko, mbaetɨ ave ipo omopüa chekotɨ chemotareɨ vae, chepuere añemi chugüi vae.

¹³ ¡Ërei nde cheïru köiño yae vae etei ko reyapo cheve, nde cherëtara, cheguataïru,

¹⁴ ñanemiari ngatuse opaño mbaembae re vae, yaguata pävese yaja Tumpa jo pe vae!

¹⁵ ¡Tomanoɨvɨ cherovaicho! ¡Tojo omanogüe reta ñogüɨnoia pe jekove reve, echa oime ikavimbae ipɨa pe jare jo pe!

¹⁶ Ërei che, ayerureta Tumpa pe; cheYa chereroasayepeta.

¹⁷ Kaaru yave jare ndeimbove yave, jare kuaraɨ ara mbɨte pe chepɨatɨtɨ yae reve ayerure, jare jae oenduta cheve.

¹⁸ Jae chereepɨta, güɨroasayepeta cherekove ñeraroa pe, yepe tëi jeta cherovaicho.

¹⁹ Tumpa oiko avei vae oenduta, jare omomichita; echa jae reta mbaetɨ oyepoepɨ jare mbaetɨ oipoɨu Tumpa güi.

²⁰ Jae reta omopüa ipo iñeïru mbaetɨ teko güɨnoi vae kotɨ, mbaetɨ ombopo ñererökuavee päve oyapo jae ndive vae.

²¹ Ñee oë iyuru güi vae, neche kɨra ipɨuasɨ kavi rami, ërei ngatu ipɨa pe oï ñeraro. Iñee kaviasɨ, asaite iïchɨi kavi rami, ërei ngatu jae ko kɨse oyeimbee kavi vae rami.

²² Eeya ndeyemoambeko yandeYa pe, jae neñono kavita; jae ngaraa omaeño ogüɨapi kuimbae jupi vae.

²³ CheRu Tumpa, nde remondota kañɨtei pe jókuae oporoyuka jare iyapu vae, ngaraa kërai ave ɨma oikove oiko, ërei che ndereño ayeko.