SALMOS 52 - Biblia Guarani Tumpa Iñee

SALMO 52 Jeko kavimbae iyembotuicha osirivembae

¹ ¿Maera pa reyembotuicha ndereko kavimbae re, nde imbaepuere yae vae? ¡Tumpa iporoaɨu opambae ko!

² Ikavimbae reño reyemongeta; nekü kɨse jaimbe yae vae rami.

³ Ikavimbae reipota yae ikavi vae güi, apu reipota yae añete vae güi.

⁴ Nde, ndeapu yae vae, reaɨu yae ñee ikavimbae vae.

⁵ Jáeramo, Tumpa ndemboaita jekuae avei pegua, ndemboaita, nemoëta ndero güi, oekɨta ndegüi nderekove.

⁶ Jupi rupi yogüɨreko vae oechata kuae jare okɨɨye retata, opuka retata jese, jei reve:

⁷ “Mase, ko kuimbae mbaetɨ Tumpa re oyeko vae, mbaeyekou jeta güɨnoi reño güɨrovia katu, jare oiko jeko kavimbae peño.”

⁸ Ërei che aï Tumpa jo pe olivo jokɨ katu rami, Tumpa iporoparareko re ayeko avei jekuae avei pegua.

⁹ Amboeteta jekuae avei rupi, echa jae ipɨakavi, amoërakuata nderee, jupi vae reta jóvai, echa ndeporoparareko ko.