SALMOS 51 - Biblia Guarani Tumpa Iñee

SALMO 51 Yepoepɨ jare yerure yetɨo pegua

¹ CheRu Tumpa, nde ndeporoparareko jeko pegua cheparareko, emboai chepɨapochɨ, ndepɨakavi jare ndeporoaɨu yae jeko pegua.

² Cheyoe yeyé ikavimbae güi, chetɨo cheyoa güi.

³ Echa che aikuaa chepɨapochɨ ko vae, cheyoa güi mbaetɨ chepuere cheakañɨ.

⁴ Ndekotɨ, ndekotɨño cheyoa, ayapo ikavimbae nderesa róvai; ikavimbae remae jese vae ayapo, jáeramo, chejäa vae, jupi ko.

⁵ Mase, ikavimbae pe akuakuaa, iyoa vae ko che chesɨ jɨe peve.

⁶ Mase, nde reaɨu yae ko ipɨa jupi vae; jare reñono cheɨvɨte pe ndearakuaa katu.

⁷ Chetɨo ñana hisopo pe, jare taiko chekɨambae; cheyoe, jare taiko iroɨ tïiasɨ vae rami;

⁸ Emee cheve vɨakatu jare yerovia, jare avɨakatu yeta chembopɨatɨtɨ vae güi.

⁹ Eñomi nderova cheyoa reta güi, jare emboai opaete ikavimbae oï cheré vae.

¹⁰ CheRu Tumpa, eitɨo chepɨa jare embopɨau, emee chepɨarä ikɨambae jare jupi vae, jare chembopɨau sɨmbi rupi aiko vaerä.

¹¹ Agüɨye chemombo nderóvai güi, jare agüɨye eekɨ chegüi ndeEspíritu ikɨambae.

¹² Emboyerova cheve vɨakatu ndeporogüɨroasayepe; jare ndeespíritu ipɨakavi vae tachemborɨ.

¹³ Jayave amboeta iyoa vae reta nderemimbota re, jare iyoa vae reta oyepoepɨta ndekotɨ.

¹⁴ Chereepɨ oporoyuka vae reta güi, cheRu Tumpa, Tumpa chereepɨ vae; atairarita ndembaejupi.

¹⁵ CheYa, eipea cheyuru, jare tatairari toromboete.

¹⁶ Echa mbaetɨ reipota mɨmba oyeyukagüe, amee ndeve mbota mɨmba oyeyukagüe opaetei oyeapɨ vae yave, mbaetɨ reipota.

¹⁷ Ërei mbota Tumpa pegua vae, jae ko ipɨatɨtɨ yae vae; iyoa güi ipɨatɨtɨ vae jare ipɨa omomichi vae ngaraa nde reröɨro, cheRu Tumpa.

¹⁸ CheYa Tumpa, eyapo ikavi vae Sión pe, ndepɨakavi jeko pegua; emopüa ye Jerusalén ikësea.

¹⁹ Jayave remboresive yeta mɨmba oyeyukagüe, mɨmba reta ani mbota temitɨ jäɨ opaetei oyeapɨ vae; jayave mɨmba oyeapɨ jese vae re oñemeeta toro taɨrusu vae.