SALMOS 50 - Biblia Guarani Tumpa Iñee

SALMO 50 Tumpa ojäata ɨvɨ pegua reta

¹ YandeYa, Tumpa imbaepuere tumpa-raanga reta güi vae, imiari; oenɨi opaetei ɨvɨ pegua reta.

² Sión, ipöra yae vae güi Tumpa oyemboyekuaa.

³ Outa ñaneTumpa, ërei ngaraa kïriiño ou; jenonde outa tata oporomboai vae, iyɨ́vɨri rupi, ɨvɨtuai imbaepuere yae vae.

⁴ Oenɨita ara jare ɨvɨ, jóvai reta ojäa vaerä tëta imbae vae:

⁵ “Pemboatɨ cheve tëta chembae vae, morogüɨrökuavee päve oyapo che ndive mɨmba oyeyuka oñemee vae rupi vae.”

⁶ Jare ara reta omombeuta jupi ko vae, echa Tumpa jae ko oporojäa vae.

⁷ “Eyeapɨsaka tëta chembae, chemiarita; eyeapɨsaka tëta Israel, amoërakuata mbae ndekotɨ. ¡Che ko jae neTumpa!

⁸ Ngaraa amboeta ndeve mɨmba oyeyukagüe re, jare mɨmba oyeyukagüe opaetei oyeapɨ vae remee avei cheve vae re.

⁹ Ngaraa aeka ndeve toro taɨrusu vae nderɨmba pɨte güi, kavara kuimbae ave ngaraa aeka nderɨmba rókai güi,

¹⁰ echa chembae ko opaete mɨmba ñana rupigua, jökoraiño vi opaete mɨmba reta ɨvɨtɨ rupigua;

¹¹ chembae ko opaete ɨvɨtɨ rupi oveve vae, jare opaete oikove kaa rupi vae.

¹² Cheyɨmbɨaɨ yave, ngaraa amombeu ndeve, echa ɨvɨ chembae ko, jare opaete pɨpegua.

¹³ ¿Jau yera toro isoogüe, ani aaɨu yera kavara kuimbae jugüɨgüe re?

¹⁴ ¡Emee mbaemboete che neTumpa pe; embopo reñererökuavee vae Tuichagüe yae vae pe!

¹⁵ Jare eyerure cheve ndepɨatɨtɨ yave; che roepɨta jare nde chemboeteta.”

¹⁶ Ërei jeko kavimbae pe Tumpa jei: “¿Kërai pa nde ndepuere nemiari cheporookuai reta re, jare remombeu cheporogüɨrökuavee päve?

¹⁷ Echa mbaetɨ reipota rombosɨmbi jare mbaetɨ reendu cheñee reta.

¹⁸ Imonda vae reecha yave reo jupíe; ¡reñemoïru menda re oyuvanga vae reta ndive!

¹⁹ Ndeyuru reñono ikavimbae peguarä jare nekü oporombotavɨ vaerä.

²⁰ Nemiari kaviä avei nerëtara kotɨ. ¡Ndesɨ imembɨ kotɨ rere mbae ikavimbae!

²¹ Opaete kuae reyapo, ërei che chekïriiño; nde reyemongeta, che nde ramiño. Ërei che amboetata ndeve, ¡jaeta ndeve nderova pe etei!”

²² “Peikuaa kavi kuae, pe reta peakañɨ Tumpa güi vae, agüɨye vaerä opa pombojaɨ jaɨ, javoi mbaetɨ kia pereepɨ vaerä;

²³ mbaemboete omee cheve vae, chemboete ko. Jupi rupi kavi oiko vae pe, aechaukata cheporogüɨroasayepe.”