SALMOS 5 - Biblia Guarani Tumpa Iñee

SALMO 5 Yerure Tumpa pe iporoangareko re

¹ CheYa Tumpa, eendu cheñee; eyeapɨsaka chepüae re.

² Eyeapɨsaka kuae chesapúkai oyeendu vae re, cheRuvicha guasu jare cheRu Tumpa, echa ndeve ayerure.

³ CheYa Tumpa, ndeimbove yave eendu cheñee, ndeimbove yave añeñono nderóvai jare aäro.

⁴ Echa nde ko jae Tumpa, mbaetɨ ipɨakatu ikavimbae pe vae; jeko kavimbae ngaraa oiko nde ndive.

⁵ Ipɨayemboete vae reta ngaraa yogüɨreko nderesa róvai; reröɨro opaete mbaeyoa oyapo vae reta.

⁶ Remokañɨtei ko apu rupi imiari vae reta, pɨ̈chɨi ko ndeve oporoyuka vae jare oporombotavɨ vae.

⁷ Ërei ngatu ndeporoparareko tuicha yae ete jeko pegua chepuere aike ndero pe. Romboete aipoɨu reve kavi amae ndetupao oñeñono tee vae kotɨ.

⁸ CheYa, chereroata jupi vae rupi, cherovaicho reta jeko pegua; chereroata nderemimbota rupi.

⁹ Jae reta mbaetɨ imiari añete vae; iyɨvɨte ikaviä etei ko, tëogüe-rɨru oyepea oï rami ko iyaseo, ¡ikü pe omopöra kavi yapu!

¹⁰ ¡Eiporarauka chupe reta cheRu Tumpa! ¡Togüɨapi jae reta iporomboarakuaa raanga pe yeño! Emombo iyoa jeta yae jeko pegua, echa oyemboyovaicho reta ndekotɨ.

¹¹ Ërei ngatu toyerovia yae opaete nderé oyeko vae reta; totairari reta yerovia katu reve jekuae avei, echa nde ko reepɨ; nderé toyerovia katu opaete nderee oaɨu vae reta.

¹² Echa nde cheYa, ndeporerekua jupi vae re; ndepɨakavi pe reñova metei yeopiaka pe rami.